“الدعاء وتصوير المريض“.. 4 أشياء تستفز عمر الشناوي على السوشيال ميديا

شدوى ممدوح عمر الشناوي

قال الفنان عمر الشناوي، إن هناك 4 أشياء تستفزه على السوشيال ميديا كالدعاء في منشور، والتصوير أثناء المرض، أو تصوير العبادات.

قام “الشناوي“ بكتابة منشور على صفحته الشخصية على موقع “فيسبوك“، وجاء فيه الآتي: “أكتر 4 حاجات بتستفزني الناس بتعملها علي مواقع التواصل الاجتماعي، أولا الدعاء في صورة بوست، ثانيا تصوير نفسهم أثناء المرض أو حد يصورهم وينشروها، ثالثا التصوير أثناء القيام بعبادات الصلاة أو الزكاة أو الحج وينشرها، رابعا معاتبة حد مجهول الهوية”.

نرشح لك: عمر الشناوي: رمضان ظالم لكل المسلسلات وأحببت شخصية “زين” لأنه شرير

تابع: “ليه؟ بيستفزوني جدا، أولا لو عاوز تدعي الدعاء ده لربنا بيوصل بمجرد ما تفكر فيه مش لازم حتي تقوله بصوت عالي ومش هيوصل أسرع علي الفيسبوك، ثانيا لو أنت فاضي تصور نفسك وأنت مريض وتخش تنزلها على الإنترنت يبقي أنت في الحقيقة مش مريض أوي لأنك لو مريض أوي مش هيبقى في دماغك خالص الكلام ده ومعناه إنك محتاج اهتمام أو مواساة فقولها صريحة عادي هنواسيك متخافش“.

أضاف: “ثالثاً العبادة دي حاجة بينك وبين ربك وهيديلك أجرها إنما أول ما بننشرها بقى اسمها رياء وبتفقد معناها والحقيقة أنت بتقول بطريقة غير مباشرة شوفوا أنا متدين إزاي، رابعا عاوز تعاتب حد أبعتله بينك وبينه، عاوز تفضحه قول بعلو صوتك فلان أنا مش طايقك، إنما البوست المجهول ده مايع أوي ملوش لازمة أكتر من إنك اخدت من وقتي إني أقراه ومفيدتنيش بحاجة غير إني أقول يا حرام ده زعلان أوي والناس وحشة أوي على فكرة كلنا شاربين المر من بعض عادي بنكمل يومنا وبنسامح والدنيا بتمشي“.

يذكر أن آخر أعمال الفنان عمر الشناوي كان مسلسل “رانيا وسكينة” بطولة روبي، ومي عمر، وأحمد خالد صالح، وصبا الرافعي، وأوتاكا، ونبيل نور الدين، وسليمان عيد، والعمل من تأليف محمد صلاح العزب، وإخراج شيرين عادل.

وقدم فيه دور “زين” زوج رانيا التي جسدتها مي عمر، المخادع والخائن، حيث تعاون مع أخوتها لتوريطها في جريمة للاستيلاء على أموالها، حيث إنه تزوج منها طمعًا في أموالها.