إلهام شاهين عن التبرع بالأعضاء بعد الوفاة: "مفيش حد بيطول عمر حد"
شروق عبد الحميد
أعلنت الفنانة إلهام شاهين، عن التبرع بجميع أعضاء جسدها السليمة عقب وفاتها لمن يحتاجها، كما دعت الآخرين للمشاركة في هذه المبادرة لإنقاذ حياة الغير ومحاولة توفير حياة بلا معاناة أو مشقة له.
قالت “شاهين” في فيديو لها نشرته على حسابها الرسمي بموقع تبادل الصور والفيديوهات “إنستجرام“: “أنا أُعلن تبرعي بكل أعضاء جسدي السليمة بعد وفاتي لمن يحتاج ليها، أي إنسان محتاج قلب، كلية، رئة، قرنية، كبد، أنت ممكن لما تتبرع تفيد ناس كتير مش شخص واحد بس”.
نرشح لك: إلهام شاهين: وثقت طلب التبرع بأعضائي بعد وفاتي في الشهر العقاري
تابعت: “أنت مش هتخسر حاجة، الجسد ده هيفنى وينتهي وياكله الدود وهيبقى في التراب، فبالعكس إحنا كده بنعمل خير وبنبقى أكتر إنسانية مع بعض وبنخفف ألآم الآخرين، مفيش حد بيطول عمر حد لأن العمر ده ليه وقت ومكتوب، لكن على الأقل بنخفف عنه الألم ونحميه من الحياة التعيسة والأدوية الكتير”.
كما دعت الجمهور للمشاركة في هذه المبادرة، مردفة: “لو أي إنسان في إيده أنه يعمل هذا الخير يعمله، لازم يكون عندنا هذه الثقافة وهذا الوعي الإنساني المهم جدا جدا”، أشارت إلى أنها سألت المشايخ بشأن صحة هذا الأمر، موضحة: “أنا قبل ما أقول الكلام ده سألت الشيوخ مستنيرة وقالوا لي أنه حلال جدا، واتقالي منهم أنهم شخصيا معلنين ده ومتبرعين بأعضاء جسدهم السليمة بعد وفاتهم”.
اضافت: “كل إنسان مستنير وبيحب الإنسانية والخير وبيحب بلده هيعمل ده، ويا ريت الدولة تعملنا خانة في الرقم القومي يكون مكتوب فيها أن أنا موافق على التبرع، بحيث أنه الإنسان لما يموت حتى لو أهله معملوش ده يبقى مكتوب في الرقم القومي بتاعه وعلى الدولة أنها تستفيد بده وتاخد الجثمان فعلا، وفي نفس الوقت لازم يبقى فيه عندنا بنك لزراعة الأعضاء ويتشال فيه الأعضاء دي لمن يريد، ويا رب نقدر كلنا أننا نعمل الخير وننشر الحب والمعاني الإنسانية الجميلة بينا وبين بعض”.
View this post on Instagram
وفي نفس السياق كانت الفنانة إلهام شاهين، قد كشفت أنها وثقت توكيل رسمي يفيد بتبرعها بأعضائها بعد وفاتها، في الشهر العقاري، مؤكدة أن ذلك “خير”، وتدعو له، لافتة إلى أنها أوصت أشقائها بذلك؟
أضافت “شاهين” خلال مداخلة هاتفية مع قناة “الشمس”: “الأعضاء دي هتموت معانا يعني هتخلص، ليه محدش يستفيد بيها؟ ترحمه من الآلام والعذاب، تخليه يعيش الفترة اللي هيعيشها بدون ألم”.
أكدت الفنانة أن كافة رجال الدين الذين استمعت إلى آرائهم في موضوع التبرع بالأعضاء قالوا إنه حلال.
وعن رجال الدين الرافضين له قالت: “الأكيد إن ربنا مش ممكن يحرم شيء إنساني يرحم البشر من الألم، لا يمكن أصدق، في أشياء العقل والمنطق نفكر بيها، إيه اللي هيضر الإسلام بعد ما يموت إن تتاخد الأجزاء دي، أنا خلاص مت هعمل بيهم إيه؟ أي شيء إنساني يساعد الآخرين لازم يكون حلال”.
كما أكدت أن الدولة أقرت قانون التبرع بالأعضاء منذ سنوات، ولكن يجب أن تفعله، لكي يسهل خطوات نقل الأعضاء من المتبرعين بعد وفاتهم، معلقة: “لو مت دلوقتي عايزة أتبرع بس مش هيعرفوا يعملوا ايه؟ فلازم الدولة تنسق ده”.