زينة: في حد بيقفل عليا الشغل من 5 سنين

قالت الفنانة زينة، إن هناك شخص يحاول الوقوف والتصدي لمسيرتها المهنية منذ خمس سنوات، وإنها مستمرة بالعمل لأجل أولادها.

تابعت خلال لقائها مع الإعلامي عمرو أديب في برنامج “الحكاية“، المذاع عبر شاشة “mbc مصر”: “أنا بكره الجملة دي وبحتقر أي حد يقول الست متعرفش تعيش من غير راجل، يعني إيه؟ ما إحنا بني أدمين ونقدر نخدم نفسنا.. خليكي جدعة واقفي واشتغلي، ممكن أي ست تعيش من غير راجل، وبردو إنك تعمل بيت دي حاجة كويسة جدا، أنا مثلا اتربيت في بيت شبعني حب يكفيني ويكفي عيالي”.

نرشح لك: عفاف شعيب ترد على هجوم شراء ملابسها من ألمانيا

أضافت: “في شخص مقفل عليا الشغل من 5 سنين وبيتقال بلاش زينة معرفش ليه، في ناس بتقول هي مش عاوزه تشتغل وعاوزة تربي عيالها، وهو أنا هربي عيالي ازاي؟ فاتحة فرن في البيت؟ أنا بشتغل عشان عيالي، وشغلي ده حاربت ناس كتير أولهم أمي علشانه”.

وعن سبب عدم تفكيرها في الارتباط في الفترة الحالية، أوضحت: “أنا بقيت أعرف أشوف اللي قدامي كويس ولا وحش من جواه، لدرجة إني بقيت بقول كفاية مش عاوزة أعرف حاجة وعاوزة أشوف الناس كويسة، وكمان أنا مقابلتش حد كويس لأن الناس بقت صعبة ودماغها خربانة، عشان كده اللي عنده حد كويس يمسك فيه ومايسيبوش”.

يشار إلى أن آخر أعمال زينة، مسلسل “الليلة واللي فيها” بطولتها مع محمد شاهين، ومغني الراب أبيوسف، وسماح أنور، وهو من تأليف محمد رجاء وإخراج هاني خليفة، والمسلسل مكون من 6 حلقات، وتم عرضه عبر منصة “شاهد”.