محمد أبو بكر يوضح حكم تفضيل الولد على البنت

رد الشيخ محمد أبو بكر، على سؤال إحدى المتابعات تقول فيه: “إحنا خمس بنات وولدين الأب جاب عربيتين للأولاد، وإحنا مخدناش حاجة، وقولنا له اكتب لنا بيت أو أرض مرضيش، والأم والأب بيزعلوا مننا وبيكرهونا”.

أجاب “أبو بكر” خلال حلقة اليوم من برنامج “إني قريب”، المذاع عبر شاشة “النهار”، أن مال الأب ملك له، وتصرفه في المال حال حياته تصرف صحيح، ولكن البنات سيأتون للأب أمام الله يوم القيامة ويقولون له كيف تفضل الأولاد علينا؟ كيف تكرمهم ولا تكرمنا؟.

نرشح لك: سعد الدين الهلالي يوضح حكم الزكاة في حُلي المرأة

أضاف: “في الدنيا محدش هيقدر يكلمك فلوسك وأنت حر، لكن خلي بالك أنت ستقف بين يدي حاكم عادل، ربنا هيقولك إزاي هتقول له أصل أنا بحب الولاد أكتر من البنات، هيقولك هو أنت اللي خلقتهم؟ هو المال كان مالك؟ أنت مستخلف فيه هو أنا أمرتك بكده؟ البنت دي ممكن يوم القيامة متسامحش في حقها وتمنعك من دخول الجنة وتحبسك على قنطرة المظالم”.

أشار: “كان في راجل قاعد عند النبي صلى الله عليه وسلم، فدخل ابنه الصبي الصغير الحلو فقبله واحتضنه ووضعه على فخذه، وبعدين دخلت البنوتة والوحشة الكخة فقبلها واحتضنها ووضعها على الأرض، فالنبي غضب وقال له “ألا سويت بينهما”، كنت حطها على فخدك التاني، ده في قعدة من قعدات الدنيا والولد والبنت ممكن ميفتكروهاش أصلا، فكيف الحال لما البنت تدخل عليك وأنت قاعد مكشر وتقول جالنا النكد، والولد يدخل تقول يا هلا وهو قليل الأدب ولسانه طويل”.

أردف: “هتقول دي متجوزة يا عم الشيخ، وسع عليها يا سيدي، أرفع قدرها قدام جوزها، عشان كده بقول حسبي الله ونعم الوكيل في كل أب وأم يكونوا سبب في قطيعة الأرحام بين أولادهم لتفرقتهم في المعاملة أو العطاء أو الإكرام”.