مروة سامي تكتب: يا رايحين للنبي الغالي
أفتح التليفزيون … أقلب في القنوات .. خمس دقائق … أبحث عن الريموت التائه وسط شلتات الكنبة التي تخبئه مني عن عمد لتغيظني لأنني أطبق على أنفاسها…حد يقفل البتاع دااااااااااا.
لن أشاهد التليفزيون البتة وسأتجه مباشرة نحو الانترنت ويوتيوبي حبيبي, أشاهد ما يحلو لي. لماذا أستفز نفسي؟ هل أنا ماسوخية؟ يعني أيه ماسوخية؟؟؟؟
المهم .. على الشاشة المتربة، مذيع لزج يسأل سيدة تجاوزت الثمانين, تجاعيد وجهها أخاديد هدتها قلة الحيلة..اسمك إيه يا حاجة ؟ أم إسلام يابني.. يسمع من بقك ربنا و احج يا رب. تحبي تسمعي أغنية ايه يا حاجة بمناسبة وقفة عرفات ؟ الله… هو دا برنامج أماني و أغاني؟ هو التلفزيون بايظ و لا ايه ؟ ما علينا.. السيدة الثمانينة: و النبي يا ابني تسمعني أغنية (يا رايحين للنبي الغالي ) … أنا:معلش يا حاجة هتسمعيها فين أساسا؟ … هو انتي عندك تليفزيون أساسا؟
تسطرد السيدة: والنبي تتوسطلي و تكلموا المشايخ بتوع الحج في الحجاز يطلعوني ببلاش.. و النبي يابني إلهي ينصرك… يقطع كلام السيدة على أغنية ليلى مراد … فين الزفت الريموت ؟؟؟؟؟؟؟؟
دائما ما أغلق الشاشة و تظل أسئلة وجودية تطن في أذني مثل نحلة في موسم البرسيم الحجازي (معرفش الحجازي دا صنف و لا طعم و لا أيه)…
س1 : هل يجب أن تكون زيارة بيت الله الحرام بكل هذه المبالغ الطائلة؟
س2: أين تذهب المبالغ المهولة التي يدفعها الحجيج سنويا؟
س3: هو مش آية 19 سورة التوبة بتقول: “أَجَعَلْتُمْ سِقَايَةَ الْحَاجِّ وَعِمَارَةَ الْمَسْجِدِ الْحَرَامِ كَمَنْ آمَنَ بِاللَّهِ وَالْيَوْمِ الْآخِرِ وَجَاهَدَ فِي سَبِيلِ اللَّهِ ۚ لَا يَسْتَوُونَ عِندَ اللَّهِ ۗ وَاللَّهُ لَا يَهْدِي الْقَوْمَ الظَّالِمِينَ. صدق الله العظيم”.
الله! يعني كُبارات مكة أيام الجاهلية كانو بيتفشخروا بانهم بيسقو الحجيج و يعمرون المسجد و يحموا قوافل الحج لدرجة أنهم افتكروا انهم بكدة مش محتاجين يؤمنوا بالإسلام و أن ربنا راض عنهم… و أن عبد المطلب جد النبي كان بيشرف على هذا الأمر بل و بيحلي الماء بالزبيب و كل دا من حر ماله, و بدعم لوجيستي و أيضا روحاني من حيث جاءته الرؤيا بموضع بئر زمزم فأعاد حفرها لتسقي الحجيج لدرجة أن وضعه المالي اهتز بسبب ذلك.
الله! أومال دلوقتي ليه دا مبيحصلش؟ و خصوصا و هما بقى عندهم بترول؟ هو مش برضوا ملك السعودية إسمه “خادم الحرمين الشريفين”؟
معلش بقى س 4: هي مكة و المدينة اللي الناس بتزورها دلوقتي هما نفسهم مكة و المدينة اللي كانوا في عهد الإسلام الأول؟
أومال فين بيوت الصحابة , فين معالم مكة و المدينة التاريخية , لماذا يتم طمس المواقع التراثية المرتبطة بحقبة ظهور الإسلام والنبي محمد (ص)؟
لماذا تحولت المدينتين إلى مراكز تسوق ضخمة و فنادق و فقط؟؟
س5 و مش الأخير (النحلة لسة شغالة): هو الملايين التي بتروح خزينة السعودية من مصر فقط لو اتوجهت لمدة سنة واحدة لدعم و إنقاذ أطفال الشوارع أو العشوائيات ابتغاء مرضاة الله مش كدة بردو ربنا هيغفر ذنوبنا و لا إيه؟
رجاء اللي رايحين للنبي الغالي يوصولوا صوتنا و صوت الست أم إسلام للسادة المسؤلين.