خالد الجندي: الإنجازات في مصر بيتم التعتيم عليها بالشائعات

قال الشيخ خالد الجندي، إن الرئيس عبد الفتاح السيسي، يركز في كل أحاديثه على محاربة الشائعات، موضحا أن الرئيس السيسي وجه علماء الدين خلال حديثه اليوم في احتفالية ذكرى المولد النبوي بأهمية التحذير من الشائعات.

أوضح “الجندي” خلال حلقة اليوم من برنامج “لعلهم يفقهون” المذاع عبر شاشة “dmc”، أن مشكلة مصر تكمن في الشائعات وليس في الإنجازات، فمصر مع شروق شمس كل يوم نرى بها إنجازا، لافتا: “اللي شايف أن فيه إنجازات ماشي اللي مش شايف هو حر، لكن عايز أقول متديش بيان فيه معلومة وأنت لا شوفت ولا عرفت ولا فهمت”.

نرشح لك: خالد الجندي يفسر “إشارة” توافق المولد النبوي مع 6 أكتوبر

أشار: “الريس ببساطة متناهية بيقول الشائعات عاملة لنا مشكلة.. وأعداؤنا واخدين بالهم من تأثير الشائعات على المجتمع، الرئيس بيتكلم طبقا للدراسات وإحصائيات وخبرة كبيرة، ومتتصورش أن عدوك ساذج، لما تكتشف أن يوميا بتصدر من 800 إلى 900 شائعة، دي محتاجة جيش مختلف عن الجيش العسكري يحاربها”.

تابع: “مين اللي قاعد على السوشيال ميديا اللي 90% من صفحاتهم مزيفة، دول بيتكلموا بشكل مرتب وبطريقة الإلحاح، والإلحاح ده بيحول الشائعة إلى شيء بديهي، والحقيقة كل الإنجازات اللي بتحصل بيتم التعتيم عليها بشائعات تغطي عليها.. المغيب ممكن يكون دكتور أو شيخ وتلاقي عنده نظرة تشاؤمية”.

أردف: “عندنا شهوة هقول لكم عليها ولأول مرة هتسمعوها في حياتكم السبق الخبري، متعة ولقيت أنها شهوة عجيبة جدا عند الكثيرين أو المعظم أو كل الناس.. يعني يقولوا الفنان الفلاني مات أو الفنانة الفلانية عملت حادثة بعض الناس بيكونوا أسرع من البرق في أنهم يشيروا الخبر، عايز يبقى الأسبق، إيه اللي بيستفيده؟ شهوة، نوع من أنواع اللذة”.