باسم سمرة: النجومية مرتبطة بـ أنت ابن مين

قال الفنان باسم سمرة، إن مصر كانت رائدة في مجال السينما لمدة 100 عام، موضحا أنها كانت متقدمة عن جميع الدول العربية، ولكنها تتراجع الآن بسبب المعارف، وعدم إتاحة الفرصة للمواهب الشابة.

أضاف “سمرة” خلال لقائه مع الفنان عباس أبو الحسن في بودكاست “حوارات مع عباس”: “بقالنا 100 سنة بنعمل سينما، ومتقدمين عن الدول العربية كلها، وقاعدين نتراجع، وناس لسه بادئه بتتفوق، ده بيزعجني جدا.. الموضوع بقى بينحصر وينكمش وخلانا ناكل في بعض كممثلين، والحظوة للناس اللي عندهم معارف، بس مش موهوبين، في ناس أكتر موهبة منهم هما بياخدوا فرصتهم، وده ظلم”.

نرشح لك: باسم سمرة يوضح تصريحاته بشأن حذف مشاهده في “إبراهيم الأبيض”

أشار: “أنا شايف أن السينما والفن حاجة في منتهى الأهمية لينا ولبلدنا، فإحنا نتعامل معاها بالاستهانة دي وقلة القيمة، أنت عشان عندك واسطة أو معارف تاخد دور ممكن حد أحسن يعمله، المواهب اللي كانت مغرقة مصر اختفت”.

أوضح: “النجومية مش متاحة، مستحيلة، هي مرتبطة بشخصيات وشلل، وأنت ابن مين، وحماك مين، ومامتك مين، وأنتي متجوزة مين، ده حقيقي، ودي الكارثة”.

أردف: “في ولاد في المنصورة وإسكندرية والصعيد موهوبين أكتر مني، ومش متواجدين.. ليه حصرناها أن ابن الممثل لازم يبقى ممثل، وابن المخرج لازم يبقى مخرج، دي كارثة، والشللية دي فساد! إحنا هنفضل عايشين على الناس دي بس، أنا عايز مواهب جديدة”.

في سياق آخر، علق الفنان باسم سمرة، على تصريحاته التي أثارت الجدل مؤخرا بشأن حذف مشاهده في فيلم “إبراهيم الأبيض”، والتي قال فيها: “حذفوا دوري في إبراهيم الأبيض علشان وجودي كان هيعمل قلق، أنا عملت دور أكتر من رائع، وأنا من رأيي أن السقا هو اللي عمل كدة، ومش زعلان منه لأنه هو اللي خسران”.

أوضح “سمرة” خلال لقائه مع الفنان عباس أبو الحسن في بودكاست “حوارات مع عباس”، أن المخرج مروان حامد جلس معه لشرح دوره في الفيلم لأن هناك مشهدا خطيرا سيقدمه باسم سمرة وهو القفز من الدور السابع، لافتا إلى أن هذا ما جذبه للفيلم، وجعله متمسكا به، مشيرا إلى أن ذلك المشهد كان له طقوسا خاصة، فقد أدى هذا المشهد كاملا بدون تصوير لمعرفة إذا كان سينجح الأمر أم لا.

أضاف: “مروان كان حريص عليا وعلى المشهد فحب نعمل يوم بكل الناس عشان ميبقاش فيه مجال للخطأ، وكانت حاجة في منتهى الصعوبة، وبعدين فوجئت بيوم العرض مروان بيكلمني بيقول المشهد اتشال، ليه يا عم؟ من حقك تشيلني خالص، بس قولي قبلها، المخرج لو شال الدور بتاعي كله حد يقدر يكلمه؟”.

أشار: “أنا من حقي أتكلم وأقول اللي أنا عايزه واللي أنا حاسس بيه، دي حاجة صحية وإلا هعفن جوايا.. وأنا بقابل أحمد السقا وبنقعد مع بعض ومروان حامد لسه مكلمني، وقولت له اتفرج على مسلسل (منعطف خطر) ومعندناش حتة إننا نقطع في بعض، لكن من حقي أتكلم، حتى لو غلطت”.