ابنة شقيق شادية: عمتي كانت قوية وشديدة

ابنة شقيق شادية

شدوى ممدوح

قالت الفنانة التشكيلية ناهد شاكر، ابنة شقيق الفنانة الراحلة شادية: “شادية مش عمتي بس دي أمي اللي مبربياني“.

أضافت “شاكر“ خلال مداخلة هاتفية لها مع الإذاعية بسنت بكر، في برنامج “قد المقام“، المذاع عبر راديو 9090، أن والدها كان مدير أعمال الفنانة شادية، لافتة: “بابا كان مدير أعمالها وكانوا بيقعدوا يقروا مع بعض الاسكربيت ويحفظوا لبعض الأغاني وكانوا بينقاشوا الكتب مع بعض، وأغلب الحاجات دي حصلت قدامي“.

نرشح لك: صفاء جلال: اخترت أتجوز راجل شرقي وأمشي على هواه

أردفت أن والدها طاهر شاكر، هو الأخ الأصغر لشادية، مشيرة: “هو أصغر منها بسنتين وهم الاتنين كانوا كل حاجة لبعض ولما بابا توفى حصل دروب جامد أوي وكانت فترة قاسية أوي عليها وماكنتش بتقدر تفتح الاسكربيت تقراه وهو مش موجود“.

وعن أغنية “يا حبيبتي يا مصر“ التي غنتها الراحلة، قالت “شاكر”: “قالتلي إن كلمة (مصر) وحشاها وهي كان عندها بال طويل أوي للأغاني الوطنية هي وبليغ حمدي (بلبل)، من أيام النكسة وهم عملوا أغاني لشد حمية الشعب زي أغنية (أم الصابرين)، وحكاية الشجرة اللي في الأغنية جات بسبب أنهم بيقعدوا ديما وهم بيكتبوا وبيغنوا في الفراندا بتاعتها وكان قدامهم النيل والشجر“.

أضافت: “وهم قاعدين كانت شادية بتتغزل في الشجرة اللي قدامهم وهم يقوللها الله، فراحوا حطينها في الأغنية.. الشجرة كانت موجودة فعلا بس للأسف قطعوها وكانت شبه الشجر أم الشعور“، مردفة: “الناس بتحب شادية عشان الأغاني بس لو عرفوها على الحقيقة هيحبوها أكتر.. هي شخصية قوية جدا وشديدة وكان عندها كل حاجة لازم تبقى في ميعادها“.

تابعت: “كانت بتموت في الهزار وتربيتها كانت قوية وكانت حافظة مواعيد مدرستي والكلية وكانت متبعاني في كل حاجة حتى لما كنت بتعب.. شادية الماما حاجة تانية خالص، كانت بتصحينا الفجر عشان نصلي وكل واحد في البيت سماها باسم دلع وأنا كنت بقولها (أيا) من وأنا صغيرة “.