شيرين عبد الوهاب: أنا مش مدمنة مخدرات

علقت الفنانة شيرين عبد الوهاب على شائعات إدمانها للمخدرات، موضحة دور الدكتور نبيل عبد المقصود في تحسن حالتها النفسية.

قالت “عبد الوهاب” خلال لقائها في برنامج “صاحبة السعادة” المذاع على شاشة dmc وتقدمه الإعلامية إسعاد يونس: “أنا شخص طول الوقت بشتكي من نفسيتي، بس أنا بقالي شهرين حاسة إني مولودة من جديد، مبقاش فيه لوم، بقى فيه ضحك وهزار ودلع”.

نرشح لك: محامي حسام حبيب يرد على شيرين بشأن تنازلها عن القضايا ضد موكله

تابعت: “بقيت بعرف أنام، بطلت كل حاجة ممكن حد يبقى واخد عليها، يعني أنا كنت أحب أنام بحاجة تؤهلني للنوم، علشان أنا بحط دماغي على المخدة أفكر، لما اصحى أخد دوا للمعدة ودوا للحساسية، دلوقتي مابمشيش ببرشام صداع، والبركة في الدكتور نبيل عبد المقصود”.

أضافت: “وبعض التعليقات عليه كانت إيه؟ إن هو دكتور إدمان؟ طيب علشان هو دكتور إدمان لازم أبقى أنا بتعالج من الإدمان؟ هو صديقي، وبعدين في حاجة، في إدمان أدوية وأكل وعادات سيئة، الإدمان مالوش علاقة بالمخدرات بس، إحنا فلة مفيش مخدرات، أنا شمعة منورة”.

استكملت: “أنا كنت باخد دوا مسئول عن إفرازات الأفكار الوحشة في النافوخ، الدوا ده كمان بطلته، هل ده كمان إدمان مخدرات؟ فأنا كنت محتاجة انضف جسمي من كل الكلام ده، يعني ديتوكس”.