أبرزها عن عبور الأزمة الحالية.. ملخص تصريحات الرئيس السيسي خلال حفل تخرج طلبة الكليات العسكرية

شهد الرئيس عبد الفتاح السيسي، منذ قليل، حفل تخرج طلبة الكليات والمعاهد العسكرية وذلك بمقر الكلية الحربية.

ألقى الرئيس السيسي كلمة خلال الحفل، حيث قال: ” في الدنيا اللي إحنا موجودين فيها الأمور دايما بتبقى متغيرة ولكن إرادة الإنسان وقبل منها الدعم من ربنا سبحانه وتعالى وبمشيئته، كل الأمور حتى الصعبة منها بيتم التغلب عليها، لو كنتوا شوفتوا من سنتين في حفلة مماثلة زي كده كنا كلنا واقفين تقريبا ولابسين علشان الكورونا واللي كان موجود وكانت الناس كلها متصورة ساعتها أن الموضوع يغني آخر الدنيا، لاء مش آخر الدنيا ولا حاجة وانتهت بفضل الله سبحانه وتعالى وعبرت زي ما كتير من الأزمات بتعبر، وحتى الأزمة اللي إحنا موجودين فيها دلوقتي”

نرشح لك: الرئيس السيسي: لا أخشى الشائعات لإيماني بأن “الله بالغ أمره”

تابع : ” خليني أقولكم على حاجة تانية، أفكركم من سنين مش بعيدة أوي، في 2013 و2014 وبعد كده، وكان الإرهاب بيضرب في بلدنا هنا، يمكن كنتوا كلكم بتشوفوا يعني شهدائنا ومصابينا وكنتوا بتقولوا يا ترى الدنيا دي هتفضل كده ولا لاء، كنت أنا متأكد أن بفضل الله سبحانه وتعالى هتعبر زي ما كتير من الأزمات بتعبر، واللي يقرا التاريخ هيشوف كده كتير، وده اللي يهمني أقولهولكم دلوقتي لينا ولكل المصريين، ومش لكل المصريين بس الدنيا كلها، الدنيا مابتفضلش على حالها، دايما ربنا سبحانه وتعالى أيده الطيبة موجودة معانا كلنا، مع الدنيا كلها، وإلا مكانتش أبدا استمرت”.

أضاف: ” نا عايز أقول إن المرحلة دي واللي كانت صعبة علينا كلنا، ولكن بفضل من الله سبحانه وتعالى وإن شاء الله هنعبرها بخير وسلام، وأتصور أن إحنا كلنا متابعين لكل المصاعب اللي موجودة مش عندنا في بلدنا بس، في الدنيا كلها، لكن زي ما قولت كده الأزمة بتاعة كورونا اللي استمرت سنتين تقريبا عبرت بسلام، بآثارها يعني، لكن عبرت بفضل الله سبحانه وتعالى، والنهاردة إحنا موجودين بنقول خلاص يعني إحنا نقدر نقول إن الموضوع ده يعني آثاره بقت يمكن التعايش معها، برضو الأزمة اللي إحنا موجودين فيها دي، حتى لو كانت ليها آثار صعبة علينا دلوقتي، لكن أزمة وهتنتهي بفضل الله سبحانه وتعالى، اللي يبقى تبقى الأوطان، تبقى البلاد، يبقى الاستقرار، يبقى الأمان، يبقى السلام، لأن بالمناسبة مفيش بلد هتتقدم في الدنيا وتعبر مشاكلها إلا بالأمن والاستقرار”

استكمل: ” أنا اتكلمت في المسألة دي كثيرا قبل كده، وقولت لكم إن المشاهد اللي بنشوفها حوالين مننا بتؤكد حاجة واحدة بس، أن الجهد اللي بيتبذل مش بس من رجال الجيش والشرطة، من كل مواطن مصري للحفاظ على الدولة دي، الجهد ده جهد مشكور جدا، وهو اللي بيخلي الـ 104 وأكتر اللي موجودين على أرض مصر عايشين وفي أمل في بكرة، كل المصاعب اللي موجودة بفضل الله سبحانه وتعالى هنعبرها، وإحنا في خير وبخير، وأقدر أقول إن إحنا يعني واقفين برضو على أرض صلبة، معندناش تحديات كبيرة أوي زي بلاد أخرى، ليه؟ علشان بس الأمن والاستقرار اللي موجود في مصر نقدر من خلاله نعمل أي حاجة”. حفل تخرج طلبة الكليات العسكرية