ياسمين عز للمنتقدين: "أنا مش ملطشة"

شدوى ممدوح

نفت الإعلامية ياسمين عز، ما تم تداوله على لسانها خلال الفترة الماضية بخصوص التصريح المفبرك “لو جوزك على علاقة بواحدة تانية معناها أنه راجل محبوب“، لافتة: “فوتوشوب بـ 3 جنيه بيحطوه ويقولوا ياسمين عملت كده“.

قالت “عز” خلال تقديمها لحلقة اليوم، السبت، من برنامج “كلام الناس“، المذاع عبر قناة “مصر mbc”: “بقى في ظاهرة غريبة ومقززة منتشرة على السوشيال ميديا بصورة مبالغ فيها وهي الفبركة والمصيبة أن الناس تفبرك كلام أو تصريح من برنامج موجود كل يوم على الهوا وحلقاته موجودة بالكامل على (Shahd)، وفيديوهاته متاحة للجميع على مواقع التواصل الاجتماعي في كل مكان“.

نرشح لك: سمية الخشاب: لو عايزين تفلحوا اقفلوا بقكم

أضافت أن الهدف من الذي يحدث واضح وتعلمه جيدا، كذلك الناس تعلم أيضاً، مشيرة: “دلوقتي عشان تهاجم حد تشهر بيه وتفبرك صورة تقول عليها كلام هو مقلهوش عشان تجمع كام تعليق ولايك وشير، فده أسلوب الحقيقة أنا بسميه رخيص أوي.. اللي يزعل أن المفروض في ناس مثقفة وواعية بتلجأ للأسلوب ده، بيحطوا صور مشاهير أو شخصيات عامة أو إعلاميين على أي كلام وخلاص“.

تابعت: “فوتوشوب بـ 3 جنيه بيحطوه ويقولوا ياسمين عملت كده ويعملوا نفسهم لطاف ودمهم خفيف.. أنا اللي يهمني الناس الطيبة اللي ممكن تصدق الكلام ده وتشيره من غير ما يكلفوا نفسهم ويشوفوا الفيديو ويتأكدوا بنفسهم إذا كان الكلام ده اتقال ولا لا، القصة دي حصلت معايا ومع ناس كتير أكتر من مرة.. أنا مش بحب أشخصن الأمور والبرنامج ده أنا مش طالعة أتكلم في عن نفسي أنا طالعة أقدم مادة خفيفة ومفيدة، وحوارات ما تكنش موجودة في حتة“.

أردفت أن برنامجها يتمتع بطابع ومذاق خاص، لافتة: “لما المواضيع تدخل في الراجل والست والعلاقات الأسرية هرد لو الموضوع يخصني.. من كام يوم حد بعتلي بوست في صورتي وعليه كلام متفبرك والهو (لو جوزك على علاقة بواحدة تانية معناها أنه راجل محبوب) ده كلام خايب لأني مقلتش ده نهائي، وأنا مش الشخصية الضعيفة اللي جوزي يبقى في علاقة تانية واسمي عليه مش أنا خالص الكلام ده ولا أي ست كده”.

أكملت أنها لا تشجع السيدات إطلاقا على تقبل خيانة أزواجهن، مشيرة: “ده كلام حد أهبل وقاصر وغير ناضج، كلام حد فاضي قال يقول أي حاجة على لساني.. أنا مش ملطشة يا حبيبي أنا هطلع وهرد، أنا مقولتش كده وماينفعش أقول كده.. مش أنا اللي أقول الكلام وما يتصدقش عني وعلى فكرة أنا مش بطلع على الشاشة بس أنا عندي جيران وصحاب عارفني من 100 سنة فأكيد أنا عارف أنا بقول ايه عشان أطلع بره الناس دي عارفة أن دي ياسمين مش مدعية أطلع على الشاشة أقول حاجة“.

أضافت: “الأدب والطاعة والطيبة في حتة معينة، وقوة شخصيتي وأن أنا عارفة أنا مين ومع مين وبكلم مين دي حاجة ما يختلفش عليها اتنين وهو ده اللي بنادي بيه.. بقول للست كوني ناعمة وأنثى وفي نفس الوقت تكون شخصيتها قوية وجوزها معاها هي بس، ولكن تقولوني إن الراجل لو في علاقة تانية ده كلام غير محترم وأنا مقبلهوش على نفسي.. أنا لا أستفز لكن بعرف أرد كويس أوي على اللي ليا مزاج أرد عليه”.

أردفت: “لما تيجوا في الثوابت بتاعتي يبقى Stop هنا وأرد وأرد وأرد.. الكلام ده متجاب من فيديو قديم من برنامج بقاله 5 أو 6 سنين وماكنش متقال كده أصلا الفيديو أتحور.. في حد حاططني في دماغه وليه مزاج يطلع تصريح مفبرك وأنا حرقت اللي عمله دلوقتي“.

برنامج كلام الناس رئيسية قناة مصر mbc نيوز ليتر ياسمين عز