مصطفى كامل: حسام حبيب ومحامي شيرين طلبوا مساعدة النقابة

علق الفنان مصطفى كامل، نقيب الموسيقيين، على الأزمة الحالية التي تمر بها الفنانة شيرين عبد الوهاب، موضحا دور النقابة في مساندتها.

قال “كامل” خلال مداخلة هاتفية مع برنامج “حضرة المواطن” المذاع على شاشة الحدث اليوم ويقدمه الإعلامي سيد علي: “أنا حضرت موضوع الفنانة شيرين من أول امبارح لما كلمني المحامي سيد قنطوش، محامي شيرين، وقال لي إحنا محتاجين وقفة النقابة ونقيب الموسيقيين معانا وأنا متوجه لقسم النزهة، بدوري كلمت جهة مسئولة، وقولت له أنا وصلني البلاغ زي ما هقولهولك كده بالظبط، إن شيرين اتضربت ومختطفة وبتاع وأنا مش عارف حاجة، فعلا معرفش تفاصيل الموضوع”.

نرشح لك: نبيل القط عن أزمة شيرين: الحجر في حالات الإدمان لا يتم بدون قضية

تابع: “كلمت حد مسئول، قال لي الموضوع ده بقاله 5 أيام واللي دخلها المستشفى هما أهليتها، أخوها، لسبب ما أنا مش حابب ومش عايز أتطرق ليه، قولت له طيب إحنا نعمل إيه؟ المحامي بتاعها بيكلمني، والأستاذ حسام حبيب كلمني علشان اساندهم، قال لي الأستاذ حسام حبيب مالوش صفة في الموضوع لأنه لا رد الزواج رد رسمي ولا هو ممثل عنها يعني أهليته بيها منقطعة”.

أضاف: “كل اللي أقدر أقوله واللي أقدر أعلنه وجنبي مجلس الإدارة كله، كل الدعم لأختي وزميلتي الثروة القومية شيرين الصوت الذهبي، وأنا زعلان على كل اللي بيحصل ده، لها مننا كل الدعم، وقت ما تقول أنا محتاجة النقابة، إحنا دعم في ضهرها وتحت أمرها في أي حاجة، المهم نرجع شيرين اللي بنفخر بيها كلنا كمصر والوطن العربي”.

أردف: “امبارح كلمني زملائي أساتذة فنانين كبار، وقالوا لي موقفك إيه؟ قولت لهم تحت أمركم، لكن أنا الشكل العائلي للخلاف، أنا مش حابب أتدخل فيه خالص، أنا كنت مواعد الفنان أحمد سعد وأنغام ومجموعة من الزملاء أن كلنا إن شاء الله الساعة 5 كنا هنروح كلنا المستشفى، أنا في مكتبي لحد الآن معداش عليا الاستاذ أحمد سعد، وكنت قايل لكل مجلسي يلا يا جماعة نزور الفنانة شيرين عبد الوهاب أما الأمور الأسرية والشخصية أنا مش فاهم فيها حاجة ومتهيألي أن عيب عليا إني أقحم نفسي”.