تفاصيل معاناة ملك زاهر مع إنفلونزا الخنازير

تحدثت الفنانة ملك زاهر، عن معاناتها مع إنفلونزا الخنازير، موضحة أنها كانت في الصف الثاني الابتدائي، ووالدها رفض ذهابا إلى المدرسة وكان ذلك في وقت الامتحانات، لذلك عادت تلك السنة مرة أخرى

أشارت “زاهر” خلال لقائها مع الإعلامية منى الشاذلي في برنامج “معكم منى الشاذلي” المذاع عبر شاشة “CBC”: “أنا في تانية ابتدائي جالي إنفلونزا الخنازير، بابا ساعتها كلم المدرسة قالهم اقفلوا الفصل عشان محدش يتأذي مرضيوش قعدني وقال مش هتكمل السنة، كان وقت امتحانات وكان لازم أقعد أتعالج عشان أخف، لأنهم كانوا خايفين جدا”.

نرشح لك: سبب رفض ميدو عادل لمنظومة الزواج

أضافت: “بابا وماما قعدوا معايا لأن أنا كنت بروح أنا فاكرة الفترة دي كانت بتخبط دماغها في الحيط الدكتورة قالها أول ما تقولك أنا جعانة اعرفي أنها خفت، وبعد 10 أيام قلت لها يا ماما أنا جعانة، طول العشر أيام كنت من غير أكل وكانوا بيحطوني في مياه ساقعة، تعبت جدا وكانت حاجة صعبة ووقفت السنة دي قلت هعيد تانية عشان مخدتهاش وليلى مرضيوش يخلوها تعيد أولى ودخلت معايا تانية”.

من جانبها قالت الفنانة ليلى أحمد زاهر، إنها مستمتعة بالدراسة جدا في كلية الإعلام، موضحة أن الثانوية العامة كانت أصعب سنة في حياتها.

أشارت: “الثانوية العامة كانت أصعب سنة في حياتي شعري كان بيقع كنت بروح لماما أقول له شعري بيقع، شعري فضي ووقع كله من التوتر، ووقتها كنت بصور مسلسلين.. السنة دي بالذات أنا كنت بموت، مكنتش بنام، كلمت دكتور قلت له أنا مش عارفة أنام، وقاعدة مبلمة طول الوقت ومش عارفة أتعامل مع الناس”.

فيما عبرت ملك زاهر عن مدى صعوبة هذا العام قائلة: “أنا كنت بصور مسلسل وفيلم، وخدنا الثانوية كلها في شهر، ومكناش عارفين نساعد بعض لأن أنا كنت علمي رياضة وهي كانت أدبي، وكل المدرسين قلقوني وقالوا استنى أحسن وعيدي السنة الجاية”.

يشار إلى أن آخر أعمال الفنانة ملك زاهر فيلم “فارس” بطولة أحمد زاهر، وحسين فهمي، وإيمان العاصي، نهال عنبر، أحمد صفوت، وعابد عنان، واللبنانية باميلا الكيك، وضيف الشرف صلاح عبد الله، وتدور أحداث الفيلم في إطار اجتماعي أكشن تشويقي، تأليف حسام موسى، وإنتاج أيمن يوسف، وإخراج رؤوف عبد العزيز.