الرئيس السيسي: أزمة الدولار كاشفة ولابد من الاهتمام بالمنتج المصري

انتقد الرئيس عبد الفتاح السيسي، تأخر بعض رجال الصناعة في اتخاذ خطوة البدء في المشروعات، مؤكدًا أن الدولة سوف تدعمهم في خطواتهم للنهوض بالدولة.

قال الرئيس، خلال فعاليات إطلاق الملتقى والمعرض الدولى الأول للصناعة: “مبقاش عندنا وقت نفقده أكتر من كده في الدراسات في الموضوعات المحسومة، هل تفتكر إن حد هياخد طاقة (غاز أو كهربا) أرخص من مصر؟ أنا لو سعرت الكهرباء على التسعير الحقيقي ممكن تضرب الرقم اللي بيدفع دلوقتي 10 مرات؟ وده مش هيحصل لأن احنا حريصين على الاستقرار، أنتو بتضيعوا وقت كتير أوي وفرصة كبيرة جدًا، وأتصور أن التحدي اللي احنا فيه بيولد فرصة مش عقبة زي ما الناس متصورة، والأزمة بتولد فرصة، لو احنا كان عندنا الإرادة والاستعداد”.

نرشح لك: الرئيس السيسي: منح الرخصة الذهبية للمستثمرين 3 أشهر

أضاف: “بيقولي 100 مليار بعد 5 سنين! الحلم ده بعيد أوي، أنا بتكلم بجد، عايزين البلد دي تقوم وشعبها يحس بالإزدهار، فالأرقام دي لأ، نقعد ندرس 3 أو 4 شهور بعدين نلاقي المشروع قام كمان سنتين تلاتة، بعدين دراسات مش عارف إيه، أنا بقالي 7 سنين في الشغلانة دي، وعارف إن المواضيع دي بتتأخر، عايزين ننجز ومستعد أخش معاكم يا بتوع مشروع “ابدأ” بالنص، ومش هدخل معاك عشان حاجة إلا عشان أشجع رجال الأعمال في مصر وأقول لكل واحد عايز يستثمر أنا معاك”.

أردف: “بقولكم يا مصريين اسمعوني، موضوع أزمة الدولار كاشفة، فاتورة الدولار بتزيد علينا سنة بعد سنة، ومش بنجيب بيها سلع ترفيهية، ده تطور للاقتصاد المصري، والتطور ده لو مكناش نقدر نسابق الوقت ونتحقق إننا ناخده كفرصة لينا إننا ننتج جزء كبير من المستلزمات اللي بنجيبها من برة، منها إننا نزود الناتج المحلي، والعمالة المصرية تشتغل، وكمان فيها عوائد للضرائب والكلام ده اللي بيترتب على التشغيل، مبقولش دلوقتي استهدف التصدير، استهدف إنك تغطي الطلب”.

تابع: “حد بيقولي خلي رخصة المستثمرين أطول من كده، ليه؟ لأن الحتة دي عندنا في القطاع الحكومي، فأنا بقول الكلام ده للقطاع الحكومي المصري، ساهم إنك تنجز ما يمكن كإنك بتعمل لنفسك مش للمستثمر لإننا عايزين نشتغل.. وفكرت إننا نعمل المكتب ده عندي أنا، لأن عندي القدرة أقعد أفطسكم، أقعد على الحاجة لحد ما تخلص، وأفضل أقول أعمل أعمل، لأن الحاجة لما تتعمل أقل خطورة من التأجيل”.