بسبب الكلف.. عمر كمال يزرع لحيته
شدوى ممدوح
كشف الفنان عمر كمال، عن حقيقة زراعته للحية، لافتا إلى أنه قام بالفعل بعملية زراعة من أجل شخصيته في فيلمه الجديد “ساعة استجابة“.
قال “كمال“ خلال مداخلة هاتفية له مع الإعلامي عمرو أديب، في برنامج “الحكاية”، المذاع عبر قناة “مصر mbc“: “أحرجت من تناول الصحافة والناس للموضوع.. أنا عندي فيلم بصوره اسمه (ساعة استجابة) يوم 9 هكون مخلص تصويره، في ناس كبيرة ليا الشرف إني أشتغلت معاهم فيه زي الأستاذة نبيلة عبيد، وأيتن عامر، وناس كتير جدا“.
نرشح لك: مصطفى كامل: كنا متعسفين بإلزام مطربي الراب بـ 12 عازفا
تابع: “كان مطلوب مني أستايل معين أنا الحمد لله شعري كثيف والدنيا حلوة معايا بس في ديفو صغير في جمب وشي وأي حد يعرفني يعرف ده وهو إنه في حتة كلف ولازم لما أطلع في حتة أداريها بالميكاب فروحت للدكتور وهو اللي قالي نزرع حتة الكلف ولو عاجبني أكمل بيها فبقى في جزء طبيعي في دقني وجزء مزروع فقولت أريح نفسي وأزرع وخلاص أهو منها أداري الكلف وأعمل لوك جديد“.
وعن أعماله المقبلة أشار: “أنا حالياً متوقف لأني لسه مخلص تتر الفنان محمد رجب بتاع مسلسل (الونش) عملت أغنية اسمها (اختيارك) حلوة جدا ، وعامل أغنية مع أيتن عامر في الفيلم الجديد اسمها (قلبي قلب خصة) حلوة جدا بردو، وإن شاء الله على راس السنة هنزل السينجل بتاعي“.
بالنسبة لانتشار حديث عن قرب موعد زواجه لفت إلى: “واخد خطوات في الموضوع وقريب جدا هيحصل.. من قريب كان عندي واحد صحبي داعية في البيت وأتصورت معاه صورة لقيت الصبح مصر كلها بتقول ده عمر كمال أتجوز أنا هاخد الخطوة وأعلن عنها قدام الناس مفيش حاجة بس ليه يا جماعة تخوفوني من الموضوع؟ “.
أضاف: “ربنا كرمني بواحدة بنت حلال وقولت يا رب أروح أتجوز في الحلال ليه بقى الناس تكتبلي كومنتات تجرحني وده بس لمجرد إني أتصورت جمب مأذون“.