بعد الهجوم عليها.. ميار الببلاوي: حد الله إني أركب الترند بشتيمة الناس

علقت الفنانة ميار الببلاوي، على الهجوم الذي واجهته مؤخرا من قِبل رواد مواقع التواصل الاجتماعي، عقب تصريحاتها الأخيرة في برنامج “القاهرة اليوم”.

كتبت “الببلاوي” عبر حسابها على موقع “فيس بوك”: “أنا مش هدافع عن نفسي ومش هقول إني صح بس ربنا شاهد إني بتكلم بعفوية ومبعرفش أتخابث ولا قصدي أي إساءة لأي حد من زملائي اللى بحبهم وبقدرهم وبعتز بأي عمل شاركتهم فيه طوال السنين اللي فاتت وانا لا عاوزة أجيب سيرة الفيلم ولا المشهد ولا يشرفني ونفسي أنسى والناس تنسى بس معرفش ليه بعد 25 سنة بينبشوا في الماضي”.

نرشح لك: ميار الببلاوي: “أحمد رزق قلبه أسود عشان مش راضي يصالحني”

تابعت: “في فنانات عاملين مئات الأفلام وفيها مشاهد نسأل الله المغفرة اشمعنى ميار اللى لازم تترجم وتتبهدل وكل اللى عاوز يعمل شو يبقى عليا، انا برفض كل يوم مقابلات في برامج لكن مروة صبري أخت زميلتي عبير وبحبهم هما الاثنين غير كده انا حرمت أي مقابلة غير لما أعرف طبيعة الأسئلة وهركز في كل كلمه ومش هذكر أسماء ولا مواقف بس الصحفيين واليوتيورز يرحموني من العناوين اللى ملهاش علاقة بالكلام اللى جوه الفيديو، وبالنسبة للتريند اللى انا عاوزة اركبه حد الله إني أركب التريند بشتيمة الناس ليا وعلشان أأكدلكم انا محولة موبايلي ومبردش على أي صحفي”.

أضافت: “انا نفسيتي تعبت وجالي اكتئاب وابني مضايق جدا وأختي كده كفاية وبالنسبة لإني بعمل كده علشان انا اتنسيت وعندى حب للظهور قولوا اللي يعجبكم انا ناجحة في برنامجي ولله الحمد وراضية بيه ولو جالي شغل فده رزق أشكر عليه ربنا، مجاليش مش هلجأ للطرق الرخيصة دي علشان أشتغل وبالنسبة للميكب والرموش والضوافر.. حاضر هطلعلكم زومبي علشان أبقى كده واجهة للحجاب دا كل اللي عندي وأفوض أمري إلى الله إن الله بصير بالعباد”.

يشار إلى أن الفنانة ميار الببلاوي، كانت قد لقيت انتقادات لاذعة مؤخرا، عقب تحدثها عن موقف جمعها بالفنانة الكبيرة نجلاء فتحي، حيث قالت خلال لقائها ببرنامج “القاهرة اليوم”، إن الفنانة نجلاء فتحي كانت تحاول إقناعها بتصوير أحد مشاهد فيلم “ديسكو ديسكو” مع الفنان عمرو عبدالجليل، كانت ترفض “الببلاوي” تصويره في شهر رمضان، فأخبرتها “فتحي” بأن رمضان للفقراء فقط، وليس للأغنياء، موضحة أن معظم مشاهد هذا الفيلم كانت في شهر رمضان، وكانت ترفض تصوير مشهد يجمعها بعمرو عبد الجليل أثناء الصيام، واضطرت إلى دخول الحمام وحبس نفسها به.

وعلقت على ذلك قائلة: “دخلت الحمام وقفلت على نفسي بالمفتاح وقعدوا يخبطوا عليا، كنت مستنية بس المغرب يأذن؛ كنت بقول لنفسي حتى لو استغفر الله العظيم هعمل حاجة غلط مش في صيام استنى بس لما تبقى المغرب أذنت”.

أضافت عن موقف نجلاء فتحي معها لإقناعها بتصوير المشهد: “قالتلي بصي يا حبيبتي رمضان ده معمول علشان الناس الفقرا والناس الغنية بيعملوا نفسهم إنهم ما بياكلوش علشان قدام الناس الفقرا يعني وكده، رمضان ده بتاع الناس الفقرا مش بتاع الناس العادية، احنا عندنا أكل نصوم ليه؟”.

تابعت ميار الببلاوي: “كانت عايزة تقنعني إني أعمل المشهد فقالتلي إن رمضان ده بتاع الفقرا مش بتاع أي حد، فالموضوع مش محتاج إنك تعطلينا وتأخرينا، خشي اعملي المشهد مفيش حاجة اسمها رمضان .. هي حبيبتي وأستاذتي وبحبها وبتقنع عيلة صغيرة كنت ١٧ سنة إنها تخش تعمل المشهد قبل الفطار”.