تفاصيل اتصال عمرو أديب بـ شيرين عبد الوهاب اليوم

كشف الإعلامي عمرو أديب عن تفاصيل اتصال هاتفي مع الفنانة شيرين عبد الوهاب، اليوم الجمعة، ناقلا عدة رسائل على لسانها.

قال “أديب” خلال برنامج “الحكاية” المذاع على شاشة mbc مصر: “النهاردة كان فيه بيني وبين شيرين اتصال، ونفسي اسمعكوا صوتها، صوتها جيد وقوي، أول ما قالت ألو أنا حسيت أنها كويسة، حسيت أنها عارفة حجم الحب والمودة اللي كانت موجودة ليها وهي في المستشفى، سألتها الأول عاملة إيه؟ قالت لي الحمد لله أظن أنت سامع صوتي”.

نرشح لك: محامي شيرين عبد الوهاب يكشف مكان إقامتها بعد خروجها من المستشفى

تابعت: “قولت لها آه كفارة، قالت لي كفارة بجد الحمد لله أنا بقيت كويسة دلوقتي وعايزاك تقول للناس إن أنا بقيت كويسة وعايزاك تطمن الناس عليا وتشكر كل الناس اللي كانت بتسأل عليا وأنا الحمد لله دلوقتي كويسة وقريب هرجع أحسن من الأول كتير”.

استكمل: “وقالت لي لو سمحت اشكر كل الوسط الفني والغنائي وكل الجمهور وكل الناس اللي اهتمت بيا والأستاذ المحامي ياسر قنطوش على المجهود اللي عمله، وأنا إن شاء الله هبقى كويسة وقريب يبقى لينا حوار كبير ونتكلم في أشياء كثيرة، وطلبت مني إن في الأيام القادمة نقدر نتقابل”.

أردف: “طول الحوار اللي بيننا دي شيرين اللي أنا أعرفها، هادية، جميلة، بتضحك، بتنكت، عندها تقدير كبير لكل الناس اللي وقفوا جنبها وسألوا عليها، شيرين شايفة أنها كانت في تجربة صعبة، إنما هي ست قوية وقادرة إن شاء الله تتخطى هذا الأمر، شيرين قالت لي أبلغكم أن كل الكلام عن صورة ليها مع حسام حبيب وأنهم كانوا مع بعض.. لا أساس لها من الصحة.. هي قالت لي إن هذه الصورة سياقها مش حقيقي وليس لها أي جانب من الصحة”.

أكد: “صوتها كويس، أفضل، أهدى، كل اللي نقدر نعمله أن إحنا ندعيلها أنها تشفى وتبقى في صحة جيدة ونشوفها في حفلات في مصر والوطن العربي، شيرين هي مطربة الوطن العربي، وبنفخر بيها، إن شاء الله قريب تسمعوا صوتها بنفسكوا، معرفتي أن الناس اللي بتتعالح من هذا الأمر بياخدوا وقت على ما يقدروا أنهم يكونوا طبيعيين 100٪، أنا مشوفتهاش لكن علميا وطبيا هتاخد وقت”.