مي فاروق: تعرضت لمشكلة صحية واضطريت أعمل عملية
قالت الفنانة مي فاروق، إنها تعرضت لأزمة صحية، ولكنها لم توضح ما هي الأزمة، لافتة إلى أنها لم تهتم بها إلى أن اضطرت إلى إجراء عملية جراحية، موضحة أنها بخير الآن.
أضافت “فاروق” خلال مقطع فيديو نشرته عبر حسابها على موقع التواصل الاجتماعي “فيس بوك“: “أنا بشكركم من قلبي على كل الحب والاهتمام اللي وصلني وأنا تعبانة، ومش هقدر أقولكم بعد ما ابتديت أشوف الكومنتات والرسايل والحاجات اللي مليانة تمنيات بالشفا ومليانة قلق وخوف عليا قد إيه فرقت معايا وقد إيه حسيت إني محظوظة جدا أن ربنا أنعم عليا بنعمة حبكم”.
نرشح لك: تفاصيل اتصال عمرو أديب بـ شيرين عبد الوهاب اليوم
أوضحت: “أنا الحمد لله أحسن كتير، ناس كتير بتسأل هي مالها إيه اللي حصل لها مفيش حاجة أنا كان عندي مشكلة صحية وسكت عليها كتير لحد ما اضطريت أعمل عملية جراحية، والحمد لله ربنا سترها وكان معايا جدا فيها وعدت على خير متشكرة جدا ليكم أنا محظوظة بحبكم”.
أشارت: “ومتشكرة لكل حد وقف جنبي الفترة دي مش هعرف أوصف قد إيه أنا ممتنة جدا لكل الناس اللي كانت معايا وخايفة وقلقانة عليا من قلبها ولكل فرد فيكم خد من وقته لو ثانية واحدة عشان يدعي لي أو يسأل عليا”.
أردفت: “أنا آسفة إني كنت سبب في قلقكم بتمنى من قلبي إني أكون سبب في إسعادكم وفرحتكم بس مكنوش سبب في أي قلق أو توتر بس والله الحمد لله أنها هي جت كده شكرا جدا ربنا ما يحرمني من نعمة حبكم أنتوا مش مجرد متابعين بالنسبة لي أنتوا أهل”.