"نفسي أتخن".. أبرز تصريحات ركين سعد مع "Gossips"

قالت الفنانة ركين سعد، إنها لم تحب اسمها عندما كانت طفلة، إلا أنها أحبته عندما كبرت، ووجدت أنه اسم مميز، لافتة إلى أنها تتمنى أن تزيد في الوزن، حتى يتناسب وزنها مع طولها.

أوضحت “سعد” خلال لقائها مع “Gossips”: “أنا صغيرة مكنتش بحب اسمي أوي، بس بعد ما كبرت بدأت أحبه أكتر وأحس أنه مميز، وأكتر اسم دلع بحبه ركونة، وأكتر اسم بيعصبني كان وأنا صغيرة لما يقولوا لي ركين براكين”.

نرشح لك: تفاصيل شخصية ركين سعد في مسلسل “بدم بارد”

أشارت: “من وأنا صغيرة وأنا نفسي أتخن، الناس كلها نفسها تخس، وبيتريقوا عليا بسبب الموضوع ده، بس بجد صعب، زي ما الواحد صعب يخس الناس الرفيعة صعب تتخن، أكتر وزن وصلت له 48 كيلو ونص، فأنا دلوقتي عايزة أوصل 55 كيلو، لأن طولي 164 سم، فهبقى تمام”.

في سياق آخر، عبرت ركين عن حزنها بسبب التنمر على قطتها لأنها من نوع ليس لديه شعر موضحة: “أنا عندي بسبوس قطة سفينكس اللي هي معندهاش شعر خالص، وتصرفاتها زي الكلاب أكتر من القطط، وهي لطيفة أوي بس الناس دايما بتتنمر عليها، وطول الوقت بيقولوا لي شكلها وحش أوي وزي الشيطان، بس هي الكاركتر بتاعها حنين وكيوت ولذيذة، وبتضايق أوي لما الناس يكتبوا لي تعليقات زي أعوذ بالله”.

ذكرت “سعد” أن أكثر كلمة مصرية تحبها هي كلمة” يا لهوي”، لافتة:” أكتر كلمة مصرية بحبها يا لهوي”.

ويعرض حاليًا لركين سعد مسلسل اتزان على منصة WATCH IT، والذي تقدم خلاله شخصية رحمة التي تعاني من اضطرابات نفسية وتعيش وسط صراعات عائلية وتطاردها ذكريات والدها المتوفي، وبجوار ركين يشارك في بطولة المسلسل النجوم صدقي صخر، نبيل عيسى، صفاء الطوخي، هاجر السراج، حسن مالك، ثراء جبيل، زينب غريب، دارين حداد، مروان يونس، عمر شرقي، كمال الدبكي والطفل سليم. المسلسل من تأليف سيد عمر وتسبيح ماهر ومن إخراج شادي عبد السلام.