رضوى الشربيني: حسام حبيب مغلطش في شيرين

علقت الإعلامية رضوى الشربيني على عودة الفنانة شيرين عبد الوهاب للفنان حسام حبيب وإعلان عقد قرانهما، موضحة أنها يجب أن تدرك كونها قدوة لكثير من السيدات.

قالت “الشربيني” خلال حلقة اليوم السبت من برنامج “هي وبس”، المذاع عبر شاشة “cbc سفرة” إنها ترى إنه لا يوجد دليل على أي أذى سببه حسام حبيب لشيرين عبد الوهاب، معلقة: “حد فيكم دلوقتي يقولي حسام غلط في شيرين في إيه عشان نطلع نقول على الست إن معندهاش كرامة، مفيش واقعة غير مداخلة من الأخ مش من الزوج، وعلى فكرة أنا بعدها كلمت حد من المقربين ليها وفهمتني الحكاية إيه”.

نرشح لك: بعد عودة شيرين وحسام.. ياسمين عز للجمهور: مش هشمت فيكم

أضافت: “لو مشيت معاكم للآخر هقولكم إحنا مالنا؟ إحنا فين مشكلتنا إن حسام يرجع لشيرين؟ عارفين فين المشكلة؟ المشكلة إننا سوأنا سمعة الست وسمعة الراجل، وهي عندها بنتين ليهم زمايل في المدرسة وجيران وكل الوطن العربي مبيتكلمش غير على أمهم”.

أردفت: “للأسف يا شيرين أنتي مش إنسان عادي وعشان كده حصلت الضجة العظيمة دي عليكي، ولازم تعرفي إنك قدوة لستات كتير واللي ميعرفش القصة الحقيقية هيشوفك من برة ست بلا كرامة، أرجوكي لو سمحتي خلي مشاكل بيتك جوه بيتك وخلي العك اللي حصل ده الناس تنساه، وبقول لكل الناس كفاية عك في حياتهم”.

كانت الفنانة شيرين عبد الوهاب أعلنت عن عودتها للفنان حسام حبيب رسميا، وعقد قرانهما يوم الخميس الماضي بحضور المقربين منهما فقط.

قالت “عبد الوهاب” خلال مداخلة هاتفية في برنامج “الحكاية” الذي يقدمه الإعلامي عمرو أديب على شاشة mbc مصر، أنه كان من المقرر عقد قرانهما اليوم السبت، لكن أصر “حبيب” على عقد القران في أسرع وقت ووافقته هي الرأي، معلقة: “قولتله خلاص اللي تشوفه يا سي حسام”.

أضافت: “أنا بعتذر لحسام عن أي كلام صدر مني وأنا زعلانة منه في يوم من الأيام، إحنا كنا معمولنا حاجة كبيرة أوي والحمدلله ربنا فكها بسلام.. ومقدرش أقول إنها عمل بس حاجة شبه كده، لأن أنا أصغر من إني أتكلم في حاجة زي دي بس هي ذكرت في القرآن”.