قواعد شريف مدكور لظهور المحجبات في برنامجه
انتقد الإعلامي شريف مدكور، المحجبات اللاتي لا يلتزمن بالملابس المناسبة للحجاب، موضحا أنه وضع قواعد لملابس المحجبات الذين يظهرن معه في برنامجه، لتكون لا تصف ولا تشف.
قال “مدكور” خلال فيديو نشره عبر حسابه الرسمي على موقع التواصل الاجتماعي “فيس بوك“: “أنا عندي في البرنامج عامل درس كود، يعني أي واحدة محجبة هتطلع تصور عندي لازم تكون لابسة ما لا يصف ولا يشف، لأن أنا بعرض صورة لمصر والمصريين.. ابتديت ألاحظ أن في ضيوف محجبات لابسين طرحة ومغطيين رأسهم ولابسين (بادي) وهما ممتلئات شوية وكل جسمهم متفصل، وبنطلون ضيق جدا، وجزمة كعب عالية، وميك آب كامل”.
نرشح لك: تامر أمين: لم أقصد إهانة شريف مدكور
أضاف: “كل واحد حر في لبسه، بس ده بالنسبة لي مش هيطلع على الشاشة.. فحطيت قواعد ودرس كود معروف أن أي سيدة محجبة هتظهر عندي في البرنامج لازم تكون لابسة فضفاض وألوان مش صاخبة وبنطلون واسع.. اللي اختارت تكون محجبة هي شايفة أن ده فرض وله شكل معين، اللي هو بالنسبة لي ما لا يصف ولا يشف”.
أشار: “صدرها مكنش المفروض يبقى باين، آسف في اللفظ فخادها مش المفروض تبقى متفسرة، ده اللي أنا فاهمه وشايفه، والمحجبة شايفة أنها بتتنازل شوية عن جمالها وبتبقى غير ملفتة للنظر، فإزاي حضرتك بتتحجبي وشايفة أن ده فرض والمفروض تكوني مش ملفتة للنظر ولابسة مجسم! أنا ساعات بشوف محجبات لابسين حاجات مجسمة في غير محجبات مبيلبسوهاش”.
فيما روى مدكور موقف حدث مع فتيات محجبات أثناء تقديمهن لعروض رقص باليه و”مودرن دانسنج”، قائلا: “من شهر كان معايا مدرسة أو سنتر بيعملوا شو باليه ومودرن دانسنج، لقيت 4 بنات هيعملوا شو فيهم 3 بنات محجبات وبنت مش محجبة، لابسين إيه بقى بنطلون استرتش والبادي جوا البنطلون وبتاعة شيفون مقطعة، والبنت بتنزل في الرقصة على الأرض بتعمل أوبا وفي حاجات طالعة، فأنا وقفت وقولت إيه ده؟ أنتوا إزاي محجبات وهتطلعوا كده”.
أوضح: “المدربة بتاعتهم بتقولي هما عشان اتححبوا مينفعش يرقصوا باليه؟ قولتلها آه، الباليه له لبس معين لا يناسب المحجبة، والمودرن دانسنج له لبس وحركات لا يناسب المحجبة، البنات عندهم 14 واختاروا يتحجبوا يبقى لازم يبقوا فاهمين أن في حاجات في الحياة هيتنازلوا عنها عشان هياخدوا ثواب عشان تنازلوا.. البنات عيطوا وعشان أراضيهم كملت الشو وخليت كل الكاميرات بعيد، والبنات بتعمل أوبا بقيت أبص الناحية التانية وأغض البصر مش ممكن كل حاجة باينة”.
