سميحة أيوب تكشف سبب تغيير اسمها 3 مرات

قالت الفنانة سميحة أيوب، إن عائلتها رفضت دخولها مجال الفن، وتبرأوا منها ولم يريدوا أن يذكر اسمهم بجانب اسمها، موضحة أنها أصرت على دخول الفن، وأطلقت على نفسها اسم فني وهو سميحة سامي.

أضافت” أيوب” خلال لقائها في برنامج “كلام الناس” المذاع عبر شاشة “mbc مصر” وتقدمه الإعلامية ياسمين عز، أن اسم سميحة سامي لم ينال إعجابها، فقررت تغييره وأطلقت على نفسها ناهد فريد، لافتة: “العائلة كانت رافضة إني أمثل وقالوا هنتبرى منها ومتجبش سيرتنا، وأنا أصريت أروح المعهد وسميت نفسي سميحة سامي، وكان في برنامج لغاية دلوقتي بيتذاع اسمه (عذراء الربيع) برنامج غنائي وكنت أنا البطلة بتاعته”.

نرشح لك: سبب رفض الإذاعة بث أغنية “ليه خلتني أحبك” بصوت ليلى مراد

أشارت: “جيت اشتغلت فيلم ومعجبنيش سميحة سامي قولت أغير وسميت نفسي ناهد فريد، برضو قلقانة، وبعدين قولت أنتي بتشتغلي حاجة محترمة جدا، فن تنويري جميل، ورسايل بتتقال للناس، ده أعظم شغل، أنا اسمي سميحة أيوب واللي يعجبه يعجبه، واللي ميعجبوش ميعجبوش، أيوب ده لقب العيلة وهما مكنوش عايزاني أجيب سيرة أيوب”.

أوضحت:” أنا شخصية قوية من برا بس، من جوا البني آدم هو هو، بس يمكن بيتقال عليا قوية لأن ساعات الإنسان لما بيكون عنده كسر في ناس بيبان عليها أو بتشكي، ويمكن عشان أنا مبشكيش وعمري ما شكيت لحد إلا لربنا ونفسي بيقولوا قوية، لكن المسائل الإنسانية موجودة بكل الإنسان ولكن بقدر، أنا المسائل الإنسانية عندي طبيعية”.

أردفت: “في أدوار بطلع فيها قوية الشخصية، وفي أدوار شخصيتها تعبانة، أنا لعبت أدوار متباينة مش كل دور زي التاني، أعتقد اللي بيقولوا شخصية قوية إني قدرت أقف على المسرح وأعمل مسرحيات تقيلة وكبيرة وجامدة، ويمكن من هنا جه الانطباع ده.. أنا مرة قولت لهم والله أنا نفسي أتفرج على نفسي، نفسي أشوفني لأن مبعرفش أشوفني كويس، لأني واقفة على المسرح السنة.. أنا خجولة جدا في المجتمع، ببقى خجولة جدا واتكسف ومبدأش بحاجة، ويقولوا متكبرة، ده خجل”.