فريدة سيف النصر تدافع عن شيرين: سيبوها دي من غير فرامل

دافعت الفنانة فريدة سيف النصر، عن الهجوم الذي شُن على الفنانة شيرين عبد الوهاب بعد رجوعها للفنان حسام حبيب.

كتبت “سيف النصر“ على صفحتها الرسمية على موقع “فيسبوك“: “خلصنا كلام ولا لسه علشان مامي تتكلم.. هجوم زايد عن الحد من مطربات، ممثلات، معجبات وكأن حياتهم كلهم مثالية.. الجميع عنده مشاكل وفيهم اللي أتضرب، وخيانات ومشاكل مع الأهل عادي زي باقي البشر ده في حبيب بيقتل حبيبته، طبعا كل ده غلط وأرفض عقوق الوالدين خاصة الأم عشقي أنا أمي، وطبعا الإخوات مايتعوضوش لكن بين السطور وأدق التفاصيل حاجات مانعرفهاش ماشوفناش هي فقط تعرفها“.

نرشح لك: بعد عودة شيرين وحسام.. ياسمين عز للجمهور: مش هشمت فيكم

أضافت: “الفرق بينها وبين غيرها أنها من غير فرامل اللي في قلبها وعقلها وكلها على لسانها هي كده واضحة بلاش نحاكمها بقسوة.. دي حياتها هي حاسبوها على فنها بس، هي حد غلبان أوي عايز يحب ويتحب سيبوها ولو ربنا مش عايز ماكانوش أتجوزوا تاني عيب بقى كل برنامج بمذيعاته جلد ونقد وكأنهم ملائكة عيب، والمطربات الفاضلات كفاية بقى لحد كده اللي من هنا وهناك ده مش أسلوب، محروقين أوي على أهلها طيب ظروفكم إيه مع أهاليكم أنتم؟ ما إحنا مانعرفش“.

أردفت: “لا والله هي شايلاهم بقالها كتير وبرضو تظل شيرين أحلى صوت حساس هي وأنغام المصريين الحيلة، إيه الموضوع؟ آمال ماهر كمان صوت قوي زي الحلو والحجار والناس القيمة دول سيبوها هي حالة خاصة شيرين تتجوز تتطلق هي في حالة عدم توازن بتحبه لكن مش ناسية كلامه لها، سيبوها تخوض التجربة لآخرها دي حياتها ماتهددوهاش (مش هنقف جنبك تاني) ليه يعني هي بقت جاسوسة؟“.

استطردت: “وبعدين اللي ضخم الحكاية الإعلام كفاية بقي حرام مش كده، وعلى فكرة ياشيرين أغنية (المترو) تحفة.. أقلب الصفحة ومن أول السطر، خلصنا“.

كانت الفنانة شيرين عبد الوهاب أعلنت عن عودتها للفنان حسام حبيب رسميا، وعقد قرانهما يوم الخميس الماضي بحضور المقربين منهما فقط.

قالت “عبد الوهاب” خلال مداخلة هاتفية في برنامج “الحكاية” الذي يقدمه الإعلامي عمرو أديب على شاشة mbc مصر، أنه كان من المقرر عقد قرانهما اليوم السبت، لكن أصر “حبيب” على عقد القران في أسرع وقت ووافقته هي الرأي، معلقة: “قولتله خلاص اللي تشوفه يا سي حسام”.

أضافت: “أنا بعتذر لحسام عن أي كلام صدر مني وأنا زعلانة منه في يوم من الأيام، إحنا كنا معمولنا حاجة كبيرة أوي والحمدلله ربنا فكها بسلام.. ومقدرش أقول إنها عمل بس حاجة شبه كده، لأن أنا أصغر من إني أتكلم في حاجة زي دي بس هي ذكرت في القرآن”.