آسر ياسين يرثي مساعده الشخصي
رثى الفنان آسر ياسين، مساعده الشخصي الذي رحل عن عالمنا قبل 3 أسابيع.
نشر “ياسين” عبر صفحته على موقع “فيس بوك” صورة جمعتهما، وعلق عليها بكلمات مؤثرة كتب فيها: “إهداء لمجدي.. كان المساعد بتاعي لأكتر من ١٤ سنة، قصته فيها كمية عِبر حياتية غير طبيعية، اشتغل كهربائي لمدة تلاتين سنة وبعد كده حصتله حادثة موت اتكتبله فيها عمر جديد، ومن هنا ابتدا يشتغل مساعد ليا بناءًا على نصيحة أبويا اللي رشحهولي عشان إخلاصه وأمانته.. عمره ما كان يتخيل إنه يشتغل في السيما ويقابل روبي ومني زكي ومحمود حميدة! ومش بس كده، ده كمان وقف قدام الكاميرا كذا مرة في أدوار شرفية، كل الناس حبته لأنه يخش القلب علي طول لطيبته وبساطته”.
نرشح لك: إلهام صفي الدين: شعرت بحرية بعد حلاقة شعري
تابع: “كان يخاف عليا جداً بالذات في مشاهد الأكشن، وكنا ساعات بنتقمص من بعض لما نخش في حوارات عبثية عن الحياة وبعدها نقوم مهيفيين بأي كلام زي الصورة اللي في البوست، اللذيذ في الموضوع إنه كان ييجي يسألني عن نصيحتي في حاجات شخصية علي رغم فرق السن.. مفيش طفل يشوفه غير ولازم يبتسم لا إرادياً بسبب وشه البشوش والطفولي”.
اختتم: “مجدي رحل عن عالمنا من ٣ أسابيع، ولحد النهاردة أنا ما اتكلمتش عنه. يمكن لأني بتجنب ده أو أني معتبره ماحصلش، مش عارف.. بس اللي عارفه كويس أوي أنه حقيقي واحشني. . سلام يا ميجو”.
الجدير بالذكر أن آخر أعمال الفنان آسر ياسين، مسلسل “الثمانية” والذي يكون من بطولته وشاركه في البطولة كل من الفنان خالد الصاوى وريم مصطفى، وعُرض على إحدى المنصات الرقمية “شاهد”، وهو من إخراج أحمد مدحت، وإشراف عام على الإنتاج حمادة إسماعيل وغادة عادل ومحمد علاء، وإنتاج حمادة إسماعيل.
كما شارك آسر ياسين في دراما رمضان 2022 وذلك بمسلسل “سوتس بالعربي” وهو النسخة العربية من المسلسل الأمريكي “سوتس”، وهو إخراج عصام عبد الحميد، وسيناريو وحوار محمد حفظي وياسر عبد المجيد، وبطولة آسر ياسين وأحمد داود وصبا مبارك وريم مصطفى ومحمد شاهين وتارا عماد ولبنى ونس وهدى المفتي، أحمد حسام وعدد كبير من النجوم.