أنكرت علاقتها بالمضبوطات.. ملخص أقوال منة شلبي أمام النيابة
كشف شعبان سعيد، المستشار القانوني لنقابة المهن التمثيلية، تفاصيل تحقيقات النيابة العامة مع الفنانة منة شلبي، موضحا أنه كان حاضرا معها.
أوضح “سعيد” خلال مداخلة هاتفية في برنامج “الحكاية” المذاع على شاشة mbc مصر 2 ويقدمه الإعلامي عمرو أديب: “اتصل بيا دكتور أشرف زكي النهاردة عصرا ورحت لنيابة النزهة بمصر الجديدة وحضرت التحقيقات والنيابة واجهت منة شلبي ببعض المضبوطات، وهي أنكرت علاقتها بيها وقالت علبة المكياج الخضراء فقط اللي تخصني”.
نرشح لك: إخلاء سبيل منة شلبي بضمان مالي 50 ألف جنيه
تابع: “الحقائب كانت مفتوحة، متعرفش إيه اللي جاب المضبوطات وأنكرت صلتها بالواقعة، وطلبت إخلاء سبيلها بالضمان اللي تراه النيابة مناسب، ونقابة المهن التمثيلية قررت أنها عضوة وليها محل إقامة ثابت ومعلوم ووقت ما يتم طلبها تستجيب”.
أضاف: “سنواصل مباشرة التحقيقات، وسنسدد الكفالة وتخرج فورا، وستبرأ ساحتها قريبا وأزمة وتعدي، هي قالت إن الحاجة مش بتاعتها طبعا، وأنكرت صلتها وقالت أنا أول مرة أشوفها هنا ومعرفش إيه اللي حصل وجت هنا إزاي وفوجئت بوجود المضبوطات دي وقالت أنا أول مرة أشوفها هنا في النيابة”.
أوضح: “هي كانت في مكان آخر وقالولها الشنط بتاعتك بتتفتش وفوجئت بعد كده بالمضبوطات ولم تفتش حقائبها أمامها طبعا وده طرح أمام النيابة العامة، والحقائب من السهل فتحها ومن السهل تكون دي مش حقيبتها أصلا وفوجئت بالمضبوطات وإحنا عندنا قضاء محترم ونيابة حققت واخلت سبيلها بهذا الضمان المالي”.
أكد: “علبة المكياج فيها مكياج طبعا هي نشترياها وقالت إن إحدى المحلات الشهيرة في أوروبا وأمريكا بتبيعه وقالت دي فقط علبتي، علبة مكياج جديدة، ونفت علاقتها بأي مضبوطات أخرى وقالت أنا معرفهاش وأول مرة أشوفها”.
استكمل: “منة شلبي كويسة ومتماسكة وقالت أنا مش عارفة الحاجات دي جت ازاي وواثقة في ربنا أنه هيخرجها من المأزق ده وواثقة في النيابة العامة والقضاء، وهي علشان عارفة أنها بريئة فقلبها جامد، وبنطمنها ونبشرها ونطمن جمهورها عليها، ودكتور أشرف زكي معانا ومش هيروح إلا لما يروحها بإذن الله، إن شاء الله النيابة العامة ستحقق في الموضوع وسيكون القرار بحفظ الدعوة بإذن الله”.
