محمود سعد ناعيا مفيد فوزي: "قصة نجاح كبيرة"

نعى الإعلامي محمود سعد، الكاتب الصحفي الراحل مفيد فوزي، موضحا أنه كان نجم كبير في الصحافة والإعلام، لافتا إلى أنه عمل معه لمدة 24 عاما، فقد كان له قصة نجاح كبيرة.

أشار “سعد” خلال مقطع فيديو نشره عبر قناته على “يوتيوب“، أن الراحل مفيد فوزي كان يسمي نفسه بالمحارب، مشيرا إلى أن له قصة كفاح وصراع كبيرة، وكان له فقرة ثابتة قبل وفاته بمدة قصيرة في برنامج يعبر فيها عن آرائه.

أوضح: “أنا عايز أحكي لكم عن إحساسي وأنا راجع من الكنيسة وأبونا كان بيودع مفيد بيقول هو دلوقتي اتنقل لمكان أفضل لاتساع، بعد ضيق الجسد بينتقل الإنسان للأفق الكبير، للحياة الأبدية وده كلام إحنا كمان مؤمنين بيه، لكن وأنا ماشي بالعربية سرحت، في أن مفيد فوزي قصة صراع ولغاية قريب كان له فقرة ثابتة وكان بيقول أراء تعمل صد ورد، والقضية أنه إنسان كافح عشان يبقى له وجود في هذه الحياة ثم الصمت”.

تابع: “غالبا قبل الصمت بيجي ألم، لأنه قعد شهر في العناية المركزة وكان تعبان، هي دي الحياة وهي القصة كده، وعشان كده كلام أبونا في الكنيسة عجبني جدا، أن الحياة شقى وتعب وبعدين تطلع منها بتعب ومرض وبعدين تبدأ الحياة اللي بجد، كل الكتب السماوية بتقول إن الحياة التانية هي الحياة”.

أردف: “السؤال اللي فضل يطاردني ليه الناس بتتوحش وتتصارع وتأذي بعضها من أجل إيه؟ ده الواحد مبياخدش حاجة معاه، ليه بنقطع بعض طول الوقت وليه عندنا القدرة نأذي بعض أوي، الناس بقت تأذي لمجرد الأذية”.

يذكر أن الكاتب الصحفي مفيد فوزي، رحل عن عالمنا صباح اليوم، عن عمر ناهز 89 عاما، بعد معاناة مع المرض.