أنغام تروي تفاصيل أزمتها الصحية
أنغام تروي تفاصيل أزمتها الصحية
كشفت الفنانة أنغام عن تفاصيل الأزمة الصحية التي تعرضت لها مؤخرا استدعت إجراءها عملية جراحية بسبب معاناتها من نزيف حاد، وبعد عودتها إلى منزلها عانت من مضاعفات خاصة بالعملية الجراحية التي أجرتها، وأصيبت بالتصاقات في الأمعاء مما سبب لها انسداد معوي، ما اضطرها للدخول للمستشفى.
قالت “أنغام” خلال مداخلة هاتفية في برنامج “الحكاية” الذي يقدمه الإعلامي عمرو أديب على شاشة mbc مصر: “الحمد لله طبعا اللي عديت بيه مكنش سهل، بس كان فيه قلوب كتير ودعوات وصلوات وحب، يعني يمكن الواحد بيحس أنه في محنة في وقت المحنة بس لما بتشوف القلوب الحلوة والناس اللي بتحبك والدعوات اللي بتوصل للسما وربنا بيستجيب بتعرف قيمتك عند الناس إيه وبتلمس حب يمكن مكنتش تعرف أنه موجود بالدرجة العظيمة دي، فأنا بشكر ربنا”.
نرشح لك: الموسيقار هاني فرحات يكشف تطورات حالة أنغام الصحية
تابعت: “وبشكر كل الناس، كل اللي دعوا لي واللي صلوا لي واللي ولعوا لي شموع في الكنائس والأمهات الطيبة الحلوة، وعايزة اشكر كل الناس اللي زارتني في المستشفى وأهلي وأخواتي وولادي عمر وعبد الرحمن وأمي اللي تعبت جدا الحقيقة نفسيا وجسديا”.
أضافت: “أنا في مرحلة التعافي، مجهدة شوية لأن هي خبطتين في الرأس مش خبطة واحدة، العملية الجراحية وبعدها بيومين انسداد الأمعاء والمضاعفات وخدت فترة أطول من فترة العملية وكانت أشد عليا الحقيقة فلسه بتعافى”.
استكملت: “تأثير انسداد الأمعاء عليا في المستقبل دي معلومة ممكن ناخدها من الدكتور لأني مسألتش السؤال ده لاني بحاول اتفائل، هو اللي أنا فهمته أن أي شخص بيفتح بطنه بجراحة ممكن يتعرض لالتصاقات حتى لو رجالة يعني مش بس السيدات اللي بتعمل جراحات نسائية، لاء، حتى الرجالة والأطفال ممكن يحصلهم التصاقات نتيجة مثلا عملية الزايدة، هي نسبتها كبيرة ممكن تحصل 20٪”.
أردفت: “كنت ممنوعة تماما من الاكل والشرب 10 أيام ثم سمحوا لي بالسوائل ثم الأكل، الحمد لله بأكل واشرب بس لازم كل شوية اتمشى كتير علشان أمعائي ماتبطئش ولا ترتخي”.
أوضحت: “أنا والله ما أهملت قبل العملية الأولى كنت بروح لدكتور واكتشفت إني عندي مشكلة ولازم نتعامل معاها، قال لي خلصي التزاماتك مفيش حاجة مستعجلة، فطبعا ربنا أراد غير كده والموضوع بسرعة حصل وملحقتش حتى أخلص التزاماتي الممضية والحفلات اللي اتعملها دعاية والناس اشترت التذاكر زي حفلة الكويت ومصر، فده كان أكبر همي، وبعد ما عملت العملية الجراحية كان عندي أمل إني أقدر أغني حتى وأنا قاعدة، أنا بحب اللي بعمله”.
أكدت: “بس طبعا الأمور بتمشي زي إرادة ربنا، بعدين حصلت المضاعفات، هو طبعا العين والحسد مذكور في القرآن بس أنا مش من الناس اللي بتركز خالص، أنا بتوكل على الله، دايما القرآن شغال في أوضتي قبل التصوير أو التسجيل وبستعين بالله دايما معنديش فكرة ألحقوني من الحسد وبتاع والواحد بيحاول يفدي بأمور كتير ويتصدق بس فيه إرادة ربنا في الآخر”.
اختتمت: “إن شاء الله أتمنى يكون نفسي كويس واقدر أحيي حفلة الكويت يوم 26 ديسمبر”.