ويجز: لا يوجد خلاف مع نقيب الموسيقيين

تحدث مطرب الراب ويجز عن مشاركته في حفل نهائي كأس العالم 2022 في قطر، كما أوضح حقيقة وجود خلافات بينه وبين نقيب الموسيقيين الفنان مصطفى كامل.

قال ويجز خلال مداخلة هاتفية مع برنامج “التاسعة” المذاع على شاشة القناة الأولى المصرية ويقدمه الإعلامي يوسف الحسيني: “أنا حاسس إن مفيش أي زعل وهو الراجل طلع قال إن مفيش أي زعل، وفعلا يعني حاسس إن الموضوع كله بتبقى بس ناس عايزة يعني تفتعل مشكلة علشان تبقى بتتفرج علينا بنتخانق مع بعض، معرفش بصراحة، بس أنا لحد دلوقتي مفيش أي مشكلة من ناحيتنا ولا أي مشكلة من ناحية النقابة”.

نرشح لك: مصطفى كامل: لا توجد عقوبات على ويجز بعد عودته لمصر

وعن سبب عدم ذهابه للنقابة ووصف النقيب مصطفى كامل لذلك بأنه شكل من أشكال التكبر، أوضح: “غير صحيح، أنا بقالي شهرين برة مصر وبس نرجع بالسلامة إحنا بقالنا فترة كبيرة برة، اشتغلنا في لندن وقطر، وليه ماروحش النقابة؟ إن شاء الله هنروح لما نرجع مصر”.

علق على غنائه في نهائي كأس العالم 2022 في قطر، وقال: “وفعلا مبسوط جدا بتمثيلنا برة وإن إحنا اتطلبنا في حاجة بالحجم ده، ودي مش بس حاجة علشاني أنا حاسس إن دي دفعة كبيرة أوي لأي فنان عربي أو مصري، يحس أنه سهل، إحنا بنعمل مزيكا حلوة بتشرف الجيل ده وبتطلعه بشكل كويس، وتلت اربع للفريق اللي شغالين بيه كان عربي، وكلنا مصريين حتى الموزع وفريق العمل ده كان حرصي الشديد يعني لأن مفيش حد أحسن مننا في شغله”.

أشار إلى تجربته في مجال التمثيل من خلال مشاركته في مسلسل “بيمبو”، موضحا: “التمثيل كان تجربة، وكنت بجس نبض وبشوف أنا شاطر والناس هتتبسط ولا هتضايق، وردود الأفعال كانت إيجابية، فخلتني اتحفز وعايز اشتغل في التمثيل تاني واعمل حاجة تانية وعايز أعيش شخصيات جديدة، ومناخ العمل بتاع التمثيل هو اللي خلاني حاسس إني عايز أخوض كمان تجربة واتعرف على ناس جديدة وفريق عمل كمان”.

ذكر: “بالنسبة لي مزيكا الراب جزء كويس وأنا شاطر فيه وأكيد فيه ناس شاطرين فيه اكتر مني وأنا بحاول أبقى مبتكر بشتى الطرق وأخرج من أي قالب ممكن أي حد تحطني فيه، يعني أنا رابر واكتر بشوية، لو عجبتني نوعية مزيكا جديدة هعملها واختبر نفسي فيها وهشوف التعليقات الإيجابية والسلبية، فأنا حاسس إن طول ما أنا عايش بتعلم وبخوض تجربة جديدة، وعايز عمري كفنان يبقى أطول شوية، عايز أعمل حاجة كلاسيكية، حاجة اخد فيها مزيكا مصري أو نوبي، فأنا هشوف فين إرثي وفين حاجتي اللي باجي منها وابتدي ادرسها علشان لما اطلعها تليق بالجمهور”.

استكمل: “أنا نفسي المساحة الإبداعية لينا كشباب تكون غير مقيدة، والموضوع ميبقاش ماشي على كتالوج الغناء وكتاب الغناء، أنا عايز اشتغل على مزيكا شكلها جديد”.