هل يجوز أخذ أموال من الزوج البخيل دون علمه؟ محمد أبو بكر يُجيب
رد الشيخ محمد أبو بكر، على سؤال متابعة تقول فيه: “جوزي تاجر كبير ولما أطلب منه كسوة مفيش وفين على ما يديني، وبيجيب لنفسه حاجات حلوة وماركات، ممكن أخد فلوس من وراه؟”.
قال “أبو بكر” خلال حلقة اليوم من برنامج” إني قريب” المذاع عبر شاشة النهار”: “الموضوع ده بشوفه في بيوت كتير، أنا افتكر في المدينة واحدة قالت لي أنا داخلة للنبي أشكي جوزي، أبقى بتوجع واتألم وميهونش عليه يوديني الجمعية الخيرية، في حين أنه بيروح لأحسن الدكاترة”.
نرشح لك: “زنق عليا بعربيته”.. محمد أبو بكر يروي قصة شخص تاب على يده
أشار: “أنا بقول لكل زوج زي الزوج ده، أعلم إنك سيء العشرة، وبئس الزوج، وبئس الرجل، أعلم إنك ذكر وليس رجل، أنت بخيل على نفسك وليس على زوجتك، سيدنا النبي صلى الله عليه وسلم قال إن أفضل مبلغ تخرجه مش لله، إنما أفضل مبلغ تخرجه اللي تخرجه على عيالك ومراتك ونفسك، دول في المقام الأول عند ربنا سبحانه وتعالى”.
أردف: “شوف حضرتك محروم من خير قد إيه، وشوف الست دي لما تقف بين يد الله وهي ليها مظلمة عندك، وتقول يا رب ده حبسني في بيتي، ما هي مش شغالة وقاعدة لمعاليك لرغباتك وشهواتك وعيالك، أكلمك عن ستات مبيشتروش الدوا عشان تتلاشى القيل والقال مع زوجها، ده عار، وعشان كده أنا بقول للزوجة خدي ما يكفيكي بالمعروف”.