أبرزها عن والدتها وغيرة زوجها.. 7 تصريحات لـ فيفي عبده في برنامج "كتاب الشهرة"
حلت الفنانة فيفي عبده، ضيفة على برنامج “كتاب الشهرة” الذي يقدمه الإعلامي علي ياسين عبر شاشة قناة “الجديد“.
وخلال الحلقة، أدلت “عبده” بالعديد من التصريحات عن حياتها الشخصية وعن مشوارها الفني، وجاءت تصريحاتها كالآتي:
1- رفضت الزواج من رجل هندي: “اتعرفت عليه في لبنان، كنت في حفلة مع فريد الأطرش في آخر أيامه، وكان قمر قمر، كنت بموت من جماله، ومكنتش بعرف إنجليزي أوي اتعلمت منه، وهو كان بيقولي بالعربي يا ملكة، وعزمني على الهند، واتفقنا نتجوز، بس لما رجعت مصر أبويا مات فاضطريت ما اروحش معاه الهند واتجوزه عشان أصرف على أخواتي”.
2- أحد أزواجي طلقني بسبب غيرته الزائدة: “كان بينا قصة حب رهيبة، بس كان غيار أوي، وشك فيا مع مخرج من السعودية كنت بعمل معاه فيلم، فقالي لفظ ضايقني فقلت له طلقني، وكلمت الراجل على التليفون قدامه لما رمى عليا اليمين، وقلت له أنا اتطلقت بسببك عندك استعداد تتجوزني؟ قالي مين ميتمناش يتجوز فيفي عبده”.
View this post on Instagram
3- لا يمكن أن أكون زوجة ثانية: “أخواتي كانوا بيروحوا لمرات أبويا كانت كويسة معاهم، أنا وعدت أمي مروحلهاش أبدًا لحد ما ماتت، لأن إحساس الغيرة صعب، وكمان جابت لأبويا الولد، لما كان بيجي من عندها أمي كانت بتمسك هدومه تقطعها، وأخواتي منها طيبين وكويسين الأمهات اللي كانوا بيغيروا من بعض.. لا يمكن أكون زوجة ثانية، لأن طالما أنا ماملتش عينيه مفيش حاجة هتملى عنيه”.
4- لم أكن أعلم الطريقة التي تنجب بها المرأة الأطفال: “مكنتش أعرف بيخلفوا منين، فأمي قالت لاخواتي إن الستات بتخلف من ركبها، وأنا كنت الصغيرة فيهم مقالتليش حاجة، فلما حملت، سألتهم قالولي من ركبك، فاطمنت وقلت كده هتبقى سهلة، عشان بحسبهم بيفتحوا البطن، لحد ما ولدت بنتي عزة قعدت أولد يومين أو 3 أيام وأكسرلهم في الحقن اللي بيدوهالي”.
View this post on Instagram
5- كانت أمي قاسية للغاية في تربيتها لنا: “أمي كانت قاسية جدًا، بس ربتنا كويس، كانت بتضربنا بالكرباج، ولو واحدة غلطت تضرب الخمسة.. مرة رجعت البيت لقيتها معلقة أختي في النجفة ووشها كله دم لُمت أمي وقلتلها إيه اللي أنتي عملاه ده هتموتيها.. بقولها ألف رحمة ونور عليها لأنها عرفت تربيني، مش معنى إنها كانت بتضربني إنها قاسية هي كانت بتربي”.
6- لا أحب استخدام المرآة: “مبحبش المراية خالص، ومسلماها لربنا، لأنه عالم إني مش هعرف ألعب في نفسي كتير، فسايبة كل تجعيدة، لأن كل تجعيدة في البني آدم ليها ذكرى، وبالعكس أنا احلويت عن زمان”.
7- بالنسبة لي الخبرة أهم من الدراسة: “بقول لنفسي كافحتي يا فيفي، كافحتي أوي، الدنيا بتعلم، وشهادة الخبرة أهم بكتير من شهادة المدرسة، لأن كلكم بتاخدوا نفس الكلام، لكن الحياة بتوقعك في مطب تطلع منه، هي مدرسة أكبر، فأنا اجتهدت أوي”.