مايك واحد ومسكنات.. مذيعة النهار تروي سبب الصوت الهادئ وتصدرها التريند
علقت الإعلامية منى العمدة على قرار إيقاف برنامج “الجمهورية الجديدة” وإحالتها وفريق العمل والمسؤولين عن البرنامج للتحقيق الفوري.
أوضحت “العمدة” خلال لقائها في برنامج “آخر النهار” المذاع على شاشة النهار ويقدمه الإعلامي تامر أمين، تفاصيل الحلقة التي أثارت الجدل، قائلة: “أول حلقة كانت سؤال بسيط جدا عمل ضجة غير طبيعية، أنا بسأل الضيف إيه رأيك في العاصمة الإدارية الجديدة؟.. أخدوا الصوت غيروا في الطبقة وهدوا الإضاءة، عملوا شوية مزيكا”.
نرشح لك: 6 معلومات عن المذيعة الموقوفة بقناة “النهار”
أضافت: “طبعا الفيديو اللي نزل على السوشيال ميديا كان ملعوب فيه على مستوى الصوت والإضاءة وده كان رد إحدى الجهات الرقابية في قناة النهار، قالوا الفيديو الأصلي اللي نزل مكنش كده، ده أول سبب”.
تابعت: “تاني سبب، أنا كنت مركبة مايك واحد، أنا بقالي سنتين ونص بعمل البرنامج ده، لأول مرة أركب مايك واحد، حظ، الفستان كان هاي كول ومكنش مستحمل غير مايك واحد.. فيه سبب تاني، أنا كنت عاملة عملية في ودني ولحد دلوقتي ليها أثر وباخد مسكنات ومضاد حيوي، بس ده مغيرش في طبقة الصوت، أنا صوتي كده، ولكن كان عامل حالة من الهبوط، من السكينة، مسكنات ومضاد حيوي كتير”.
استكملت: “كنت أهدى ولكن مغيرش طبقة الصوت، لأن الناس غيروا شوية في الصوت، بعدين أنا صوتي كده في 52 حلقة، برنامج “الجمهورية الجديدة” بقاله سنتين ونص على شاشة النهار، يمكن رد فعل الضيف أو طريقته أثارت الجدل، فده مع المسكنات مع الهدوء الزيادة عن اللزوم، قالوا بس بقى قصة حب، طالعين الموضوع في مشاعر، لاء خالص، يمكن طريقتي كان فيها حب وامتنان وفخر بالعاصمة الإدارية الجديدة، أنا اتشرف أنهم لقبوني بمذيعة العاصمة”.
أردفت: “أنا هقول حاجة على مسئوليتي الشخصية، أنا المذيعة الوحيدة في مصر والوطن العربي اللي كانت بتزور العاصمة الإدارية يوميا وبتشوفها وهي حبة رمل لحد ما تشوف مشاريع قومية، فطبعا لازم اسأله عن العاصمة الإدارية وأنا بقوله “إيه رأيك في العاصمة الإدارية الجديدة؟” بحب وفخر، يمكن رد فعله كان زيادة شوية، معرفش يعبر عن اللي جواه، الناس طبعا مش بتحاسب الضيف الناس بتحاسب المذيع”.
أشارت إلى أنها طبيبة صيدلانية، كما أنها قامت بالتدريس في قسم Analytical Chemistry، موضحة: “وأنا أصلا كنت عايزة أدخل إعلام ووالدي مكنش موافق، وبيقول عايز بنتي دكتورة صيدلانية وبعد كده اتجهت لإعلام بعد ما خلصت”.
