صفاء جلال: متمناش بناتي يشتغلوا في الفن
قالت الفنانة صفاء جلال، إنها لا تتمنى أن تعمل بناتها في مجال الفن لأنها مهنة صعبة، ومرهقة نفسيا وجسديا، وتفقد الشخص أشياء كثيرة.
أضافت “جلال” خلال لقائها في برنامج “التاسعة” المذاع عبر شاشة “الأولى المصرية”: “مبتمناش بناتي يشتغلوا في الفن، لأنها شغلانة متعبة نفسيا وجسمانيا وذهنيا، وبتضيع منك حاجات كتير أوي، وماشية ببركة ربنا”.
نرشح لك: شاهد.. مصطفى خاطر يحكي أصعب مواقفه على المسرح
أشارت: “السوشيال ميديا مأثرة علينا بشكل سلبي بشع، أنا بحاول مع البنات أن في وقت هنتجمع مع العيلة، في وقت هنزور تيتة وجدو لازم نعمل كده عشان يبقى في علاقات إنسانية بينا وبين بعض”.
أوضحت: “السوشيال ميديا جرأت الناس، فأقعد اشتم في صفاء أنا مبردش لكن بتضايق طبعا، إحنا بني آدمين وستات متحوزين وعندنا أولاد بيزعلوا لما يقرأوا الكلام ده وأهالينا، أنت مبتحبنيش مفيش داعي تشتمني، وأتمنى الناس تتعلم احترام الآخر”.
فيما كشفت “جلال” عن نصيحة عادل إمام لها بشأن الاكتئاب قائلة: “عادل إمام قالي اضحكي علاج الاكتئاب الضحك، ومفيش حاجة في الدنيا تستاهل إن الإنسان يكتئب عشانها بس برضو إحنا بني آدمين وبيجيلنا لحظات ضعف إنساني.. وعديت الفترة دي مع البنات بنخرج نتفسح، ونعمل أي حاجة لذيذة تخرجنا من المود”.
وعن شائعات اعتزالها التمثيل أوضحت: “معرفش مين طلع هذه الإشاعة اللطيفة، هما سألوني أنتي فين؟ قولت أنا موجودة لما بيجي لي عمل كويس بنزل أعمله وأرجع البيت.. كلنا بنمر بفترات اكتئاب، ممكن بعد عمل يكسر الدنيا أقعد سنة أو اتنين في البيت مش بمزاجي، لكن أنا بحب التمثيل وعمري ما فكرت اعتزل”.
في سياق آخر كشفت “جلال” كواليس تعاملها مع فؤاد المهندس لافتة: “فؤاد المهندس كان الشغل معاه كان متعة، وكان بيحكي عن شويكار حب عمره، مفيش كلام في الكواليس غير عن المسرحيات اللي عملها مع شويكار، وعن قد إيه هو بيحبها وشايفها أجمل نساء الكون”.