بكت بسبب نور الشريف وهذا هو اسمها الحقيقي.. أبرز تصريحات زينة في "صاحبة السعادة"
حلت الفنانة زينة ضيفة في برنامج “صاحبة السعادة” المذاع على شاشة dmc مع الفنانة إسعاد يونس، مساء أمس الاثنين.
تحدثت زينة خلال اللقاء عن زكريات عملها مع نجوم كبار كأحمد زكي ونور الشريف، وعن علاقتها بأولادها، مرورا بتحضيرات أعمالها الجديدة وغيرها من المواضيع.
نرشح لك: رمضان 2023.. صراع بين كمال أبو رية وجمال سليمان في “عملة نادرة”
وجاءت أبرز تصريحات زينة خلال لقائها مع “صاحبة السعادة” كالتالي:
١- أول أعمالي كان فيلم (أرض الخوف) مع أستاذ أحمد زكي وأستاذ داود عبد السيد، أنا كنت من المجانين بتوع الفنانين بس مع الأستاذ أحمد زكي الله يرحمه، كنت براقبه، هو كان بيقعد في مكان في شارع سوريا بيخرج منه 10,11 الصبح، اوتيل كده وكافيتريا جنب البيت عنده كان يشرب القهوة ويفطر، كنت ازوغ من المدرسة واروح استناه من بعيد، لقيت خبر أنهم بيدوروا على ممثلين للفيلم، فروحت الشركة، وقابلت أستاذ داود.
٢- كنا بنصور في السيدة زينب وأحمد زكي قاعد عمال يبصلي وجه قالي تاخدي خس وخيار؟ قولتله معكش بتنجان أو طعمية واتصالحنا على طول وكان بيكلمني في عيد ميلادي يقولي كل سنة وأنتي طيبة.
٣- عندما شاهدت الفنان نور الشريف وهو يرتدي ملابس الشخصية في مسلسل “حضرة المتهم أبي”، شعرت أنه أكبر من المكان وضخم فبكيت وهربت من المكان، “روحت معيطة وطالعة أجري، فجري ورايا بنفسه وقالي تعالي رايحة فين؟ فقولتله أنا آسفة.. حقك عليا أنا مبعرفش أمثل متزعلش مني أنا مش هقدر أشتغل مع حضرتك، فقالي أنتِ كويسة.. لو مكنتيش خوفتي كنت أنا اللي همشيكي..وأنا قصدت أخوفك”.
٤- اسمي “وسام رضا” هو اللي نزل في تتر فيلم “أرض الخوف”، بعد كده إيناس الدغيدي غيرت الاسم، كانت عايزة تسميني “قوت القلوب”، قالت لي جديد.. ساعتها قابلت عمرو دياب وكنا صحاب وقولت له عايزة تسميني “قوت القلوب”.. قال لي سيبك منها، وقال لي حلو “زينة” كانت مراته اسمها زينة، والاسم كان حلو، وثبت لما أنا مثلت.
٥- أول مرة سافرت مع أولادي وحدنا تاهوا مني في مدينة الألعاب في فرنسا، وعثرت عليهم بعد بحث كبير أنا وكل العرب الموجودين في المكان، “كنت وقعت على الأرض من كتر الخوف”.
٦- لدي فوبيا من الماء رغم كوني بطلة في السباحة في الأساس، وخلال حملي سيطرت علي حالة خوف مرضية من شرب الماء لأني كنت أشعر بالغرق.
٧- أولادي ليسوا مغرمين بالأكل، لأنهم منذ صغرهم أخرت خطوة تناولهم للطعام الطبيعي لاحتوائه على أملاح وسموم بحسب ما أوضح لي طبيبهم في أمريكا.
٨- “وأنا صغيرة كنت باكل كتير وأمي مش بتلاحق عليا في الأكل، فكنت لما أجي من المدرسة تعملي رز بشعرية وتحطلي عليه سكر عشان تخليني أفضل شبعانة فترة طويلة، لكن أولادي أنا اللي بأكلهم بإيدي لدلوقت”.
٩- مسلسلى المقبل “جعفر العمدة” لأول مرة أشترك فيه مع نجم، كبطولة مشتركة، وما شجعني أنه عمل كبير مع مخرج ونجم كبير، بالإضافة إلى قصته المميزة.
١٠- مسلسل “جعفر العمدة” هيتعرض في رمضان اللي جاي، والمسلسل مش صعيدي، هو شعبي، بس أنا دوري مش شعبي، يعني محمد رمضان، أستاذة هالة صدقي، ومجموعة الممثلين معظمهم شعبي إلا أنا.