هل يجوز إجراء حقن مجهري لتحديد نوع الجنين؟ عويضة عثمان يجيب
ورد سؤال للشيخ عويضة عثمان، أمين الفتوى بدار الإفتاء المصرية، تقول صاحبته: “هل يجوز إني أعمل عملية حقن مجهري عشان أخلف ولد أنا معايا 4 بنات وحمايا بيضغط عليا عشان عايز ولد يحمل اسمه؟”.
أجاب “عويضة” خلال لقائه في برنامج “الدنيا بخير” المذاع عبر شاشة “الحياة” وتقدمه الإعلامية لمياء فهمي: “قال تعالى (وَمَا أُوتِيتُم مِّنَ الْعِلْمِ إِلَّا قَلِيلًا)، فالله سبحانه وتعالى عندما يفتح للناس باب علم فهو بإذنه، هي مسألة اختيار الجنين بنقول هذا يجوز”.
نرشح لك: حكم التصدق على الجار “المدمن”
أشار: “هو مش بيختار ولكن يقدر الله له ذلك، هو بيعمل سبب بس، فبيكتر نسبة احتمالات الذكورة عن الأنوثة بحيث يكون الغالب على الظن الولد وهذا جائز”.
في سياق آخر، قال الشيخ عويضة عثمان إن مكارم الأخلاق التي جاء النبي صلى الله عليه وسلم ليتممها كما قال في حديثه الشريف، باتت غائبة عن الناس في الوقت الحالي.
أضاف “عثمان” خلال حلقة اليوم، من برنامج “الدنيا بخير” مع الإعلامية لمياء فهمي، على قناة “الحياة”، تعليقًا على متابع يريد تطليق زوجته بسبب حديثه معها قبل الزواج على “فيس بوك” قائلًا: “الإنسان اللي بيتكلم مع واحدة على فيس بوك، ليه بيتجاوز؟ ليه بيتكلم أصلًا؟ المفروض عرف الاسم يروح يخطبها على طول ويدخل البيت من بابه”.
أضاف: “البنت بتتأثر أكتر من الرجل، لأنها حاجة جميلة لو اتكسرت صعب تتصلح، هي ليه تكلم؟ البنات لما حد بيكلمها ويوعدها بالجواز بتقع وتآمنله، واتجوزوا، والشيطان بقى بيوسوس، فاحنا هنا بنقوله اقف ومتسمعش الشيطان، لأنه تدخل بينكم، هي وثقت فيك وسلمتك كل عواطفها ومشاعرها، وبقت زوجتك وأم بنتك ونحاول نلتمس العذر ليها وننسى الفترة اللي فاتت دي”.
تابع: “والأمر التاني مين اللي أفسدها؟ مش أنت السبب؟ بعد ما فتحت ليها باب الفتنة دي تحاسبها؟ ما تحاسب نفسك، فلكل شاب بيخاطب بنت اتقي الله وكل بنت اتقي الله في أسرتك ونفسك”.
وأكد الشيخ على ضرورة التزام كل فتاة وفتى بالأخلاق أثناء تعاملاتهما، وألا يفتحا بابًا للشيطان، لأن ذلك يهدم الأسر.