بقيت أكره "تيك توك".. حسن شاكوش ينتقد أصحاب المحتوى المبتذل
أعرب مطرب المهرجانات حسن شاكوش، عن استيائه الشديد من المحتوى المبتذل الذي يقدم عبر تطبيق “تيك توك”.
نشر “شاكوش” عبر حسابه الشخصي على تطبيق “تيك توك” مقطع فيديو قال فيه: “الواحد بقى شايف حاجات غريبة يعني الموضوع بقى مقرف جدا حتى التيك توك اللي كنا بنحب نتفرج عليه عشان بيهون علينا وبنشوف حاجات تفيدنا اضحك الواحد بقى بيشوف حاجات كده عبط وهبل والعيال اللي بتعمل تحديات ولايفات والناس دي اللي بيقعد يحمي نفسه بالشطة واللي بتبهدل نفسها.. ايه يا بني ده ايه الهبل اللي انتوا فيه ده”.
نرشح لك: حسن شاكوش: “دفعت فلوس لعضو مجلس نقابة سابق عشان أشتغل”
تابع: “في حاجات على فكرة في محتوى بيجيب فلوس اسهل من قلة القيمة اللي انتوا فيها دي، انا عمري في حياتي ما اتكلمت ولا حاجة شغلت بالي ايه القرف اللي الواحد بيشوفه على تيك توك ده، في ناس كتير محترمة على تيك توك بتقدم محتوى كويس والناس كلها بتستفاد منه وانا شخصيا بستفاد منه.. إنما القرف اللي الواحد بيشوفه ايه ده”.
أضاف: “العيال اللي بتلعب تحديات إذا كان شباب ولا بنات هما فوق راسي بس بالطريقة دي لا ده قرف. اعمل حاجة تفيدك وطالما انت محتاج فلوس اعمل حاجة تفيد الناس الأول أهم من الفلوس عشان لما ربنا يكرمك وعيالك يكبروا يشوفوا انك بتقدم محتوى كويس، أصل ابنك لما هيكبر، ويلاقيك شاب أو ست هايفة هيبقى هايف زيك أو انت هتقدر تقول لابنك متعملش كده وانت أصلا كده”.
اختتم: “لا يا جماعة انا ضد كده.. قدموا محتوى برده يدخل فلوس وبرده قولت لكم الفلوس مش كل حاجة يعني اللي الواحد بيشوفه ده بصراحة قرف، أول مرة في حياتي أطلع اتكلم على حاجة اصلا انما انا بقيت بكره افتح التيك توك بسبب الاشكال والناس اللي الواحد بيشوفها”.
يشار إلى أن حسن شاكوش، كان قد احتفل مؤخرا بخطبته على فتاة من خارج الوسط الفني اسمها ريم طارق.
وحضر حفل الزفاف عدد من نجوم المهرجانات أبرزهم عمر كمال، والبلوجر علي غزلان وعدد آخر من الأهل والأصدقاء.