تامر ربيع يكتب: كوكب الهلاسين ..مجلس قيادة الكوكب
وأخيرا وبعد طول انتظار دام طويلا لفترة قصير جداً جاء وقت افتتاح الكوكب الجديد كوكب الهلاسين بحضور السادة السكان المختارين على الفرازة من كوكب الارض الشقيق اللعين ، وقد تقرر بشكل مبدئى تشكيل مجلس قيادة الكوكب للاتفاق على اهم الامور الهلسية
وتم الاختيار بشكل ديموقراطى بحت حيث قام السادة رؤساء مجلس القيادة باختيار انفسهم بشكل مباشر بدون تدخل اى شخص فى هذا الاختيار ، لان الشفافية والمهلبية اشياء اساسية من مبادىء كوكبنا الهلسى ، وتقرر افتتاح الكوكب يوم الثلاثاء الماضى بعد صلاة الجمعه مباشرة ، وجاء الموعد وجاء السادة السكان وقد تكرم السيد ابو تميم المميز بقص الشريط بمطوته الارن غزال تركية الصنع ثم قام الجميع بالتصفيق الحار المصطحب بكلمة حلااااااااااوة من الزز المشاغب ، ثم دخل الجميع الكوكب فرحين بحياتهم الجديده الخالية من كل ما عانوا منه فى كوكب الارض ، ثم قرر قائد مجلس قيادة الكوكب بالاجتماع بالمجلس للاتفاق على كيفية سير الحياة فى الكوكب وكيفية تفادى اى مشاكل من الممكن ان تعكر صفو الهليسة قاطنى الكوكب الهلسى ، وقد قرر المجلس توزيع المهام والوظائف على مجلس قيادة الكوكب وكل هليس فى مجلس القيادة ارتضى بمهامه ووظيفته الجديدة وقام الجميع بحلف الشمال الدستورى كالتالى :
ابو تميم المميز : نائب القائد
اقسم بالله العظيم ان احافظ على الهلس وان احل محل القائد فى اى شىء ما عدا العزومات والحفلات الهلسية واعمل على الحفاظ على الكوكب وسلامة اراضيه وان افعل كل مايسعد الهليسة
الزز المشاغب الفتك : وزير التخبيط
اقسم بالله العظيم ان احافظ على الهلس والرزالة وان لا اترك اى شخص فى حاله وراجل ابن راجل يجى يعمل اى شغب فى كوكبنا حلااااااااااوة
ابو جيمس : وزير الهلس والقلش والمسخره
اقسم بالله العظيم لاموت من الضحك يوميا على اى حد وعلى اى حاجة وان احافظ على الكوكب وسلامة اراضيه
لشاليشوو : وزير التسويق والشياكة
اقسم بالله العظيم ان احافظ على الهلس ياحبيبى ياهلس وان اسوق للكوكب فى كل الكواكب والمجرات المجاورة وان اراجع يوميا مدى شياكة واناقة كل الهليسة وان احافظ على الكوكب وسلامة اراضيه
سخاوى الذئب : وزير الاصول والجدعنه
اقسم بالله العظيم اللى هيخالف الاصول هوقف عليه حق وهرجعه تانى كوكب الارض علشان مش عاوزين دوشة وان احافظ على الكوكب وسلامة اراضيه
الحوت : وزير الصحة والسكان والدريفتات
اقسم بالله العظيم ان احافظ على صحة الهليسة ومنع اى كابة من الوصول اليهم وان ابث روح الفكاهة دائما وابدا وان اقوم بتعليم
الدريفتات والخمسات وسحبة مايكل لكل الهليسة الناشئين
نوفالوو : وزير المهرجانات
اقسم بالله العظيم لنعمل مهرجانات للقمة ونرقص كده ندلع ونعمل البحر طحينة ونكتب عليه اسامينا وان احافظ على الكوكب وسلامة اراضيه
اليانى : وزير السياحة والهجرة
اقسم بالله العظيم ما فى ايتها سياحة خالص لسه وربنا يفكها من عنده وان احافظ على الكوكب وسلامة اراضيه وان اغطيه كويس واشربه اللبن
العربوش : وزير الاعلام
اقسم بالله العظيم ان مافى قنواتش فضائيش هتشتغل فى كوكبنش الجميلش وكلها قنواتش للهلس فقط شششششش وان احافظ على الكوكبش وسلامتش اراضيه
المعلم بسام : وزير الشقاوة والبلطجة
اقسم بالله العظيم اللى هيعمل اى مشكلة فى الكوكب هيطلع بره الكوكب وهيفضل متعلق كده بين السما والعما اخشع ياهليس انت وهو وعلى رأى المثل استقام وشجع بسام وان احافظ على الكوكب وسلامة اراضيه
المودى : وزير التوظيف
اقسم بالله العظيم مالاقى شغل وجاى الكوكب ده بفيزا حره ولما اشتغل هشغل كل الهليسه وان احافظ على الكوكب وسلامة اراضيه
بصلايه : وزير السب والقصف
اقسم بالله العظيم معايا السيديهات بتاعتكوا كلكوا وعاوزين الاستقامه وان احافظ على الكوكب وسلامة اراضيه
الطاط : وزير الاتكيت والانتكه
اقسم بالله اللى هيقول بورجر ليطلع بره اسمه بيرجر وان احافظ على الكوكب وسلامة اراضيه
القائد : السادة اعضاء مجلس قيادة الكوكب نشكركم جميعاً على مجهوداتكم الجبارة ونتمنى لكم حياة موفقة فى كوكبنا الجديد واسعاد جميع الهليسة وتقديم كل غالى وثمين وطخين لاضفاء السعادة على كوكبنا الجميل اللذوذ الحبوب .