هل الشعب المصري متدين بطبعه؟.. رأي أحمد عكاشة

علق الدكتور أحمد عكاشة، أستاذ الطب النفسي، على عبارة “الشعب المصري متدين بطبعه”، قائلا إن المصريين لديهم تدين ولكن الطقوس الدينية غالبة.

أوضح “عكاشة” خلال برنامج “نظرة” على شاشة صدى البلد، مع الإعلامي حمدي رزق: “فيه تدين لكن الدين مش أوي، الطقوس الدينية غالبة والإسلام مش كده، الإسلام مكارم الأخلاق، المصريين أحسن ناس يعملوا الطقوس من كل المسلمين”.

تابع: “المصريين أكتر ناس بيحجوا ويعملوا عمرة وترابيزات رمضان، تلاقي ناس بيعملوا عمرة كل 6 شهور والحج كل سنة، ربنا مطلبش كده أبدا، ربنا طلب توجيه ده للعطف على المحتاج.. أنت بترشي ربنا؟ إيه اللي بتعمله ده بتحج كل سنة ليه؟ يعني أنت بتضحك عليه؟ بتعمل أخطاء وبعدين تحج فـ يغفرلك!”.

استكمل: “تفكير غريب جدا مش طبيعي، وتلاقي اللي بيحج ده كأنه فتح عكا عاملينله احتفالات”.

من جانبه، أشار إلى أن”زبيبة الصلاة” مرض جلدي، موضحا: “زبيبة الصلاة مرض جلدي، أنا مشوفتش أندونيسي عنده زبيبة، اللي هما أكتر بلد في الإسلام، مشوفتش أفغانستاني ولا سوري ولا تركي عنده، وكلهم بيصلوا، إيه اللي حصل في الجبهة بتاعة المصريين؟”.

أضاف: “أنا بقول صلي وأعمل كل حاجة بس نشف الجبهة قبل الصلاة، لأن في ناس بتقولك وهي مبلولة أحسن.. دليل ذلك أن مفيش حد في الأزهر خالص عنده زبيبة، ولا المفتي ولا شيخ الأزهر لأنه لابس عمة، والست معندهاش زبيبة علشان لابسة طرحة وهي بتصلي”.