أحمد السعدني عن والده صلاح السعدني: "مبيتفرجش غير على أعمالي"
طمأن الفنان أحمد السعدني، الجمهور على صحة والده الفنان الكبير صلاح السعدني، مؤكدا أنه بصحة جيدة ويستمتع بحياته الهادئة والبسيطة.
قال “السعدني” خلال مداخلة هاتفية مع برنامج “كلمة أخيرة“، مساء الأحد، المذاع عبر قناة “ON” مع لميس الحديدي: “الحمد لله زي الفل، بيضايق بس من الإشاعات السخيفة اللي بتطلع، بس الزمن اللي عايشين فيه والسوشيال ميديا والتريند هنعمل إيه”.
نرشح لك: رمضان 2023.. أحمد السعدني يكشف تفاصيل شخصيته في “سره الباتع”
تابع: “مستمتع بالحياة الهادية البسيطة، بيتفرج على ماتشات كورة، وتقريبا مبيتفرجش على أعمال غير اللي أنا بعملها دلوقت، بيقول أنت اللي لسه رابطني بالشغلانة دي”.
في سياق آخر، كشف الفنان أحمد السعدني، عن تفاصيل شخصيته في مسلسل “سره الباتع”، المقرر عرضه في السباق الرمضاني المقبل 2023.
قا إنه يقدم شخصية يدعى السلطان حامد، وكان متواجدا أثناء الحملة الفرنسية على مصر، موضحا: “السلطان حامد دا كان موجود أيام الحملة الفرنسية على مصر، وهو حاجة جديدة عليا خالص.. أنا وأحمد فهمي كنا متعاقدين على مسلسلات تانيه في رمضان لكن المشروع ده صعب أن الواحد ميعملوش، دي فرص مبتجيش كتير”.
أشار: “أنا كنت عايز أشتغل مع الأستاذ خالد يوسف ودي أول تجربة درامية ليه، وراجع بعد فترة كبيرة بإنتاج ضخم ورواية ليوسف إدريس ودور زي السلطان حامد، ووسط الكوكبة الكبيرة دي من النجوم، ومهما حكيت مش هقدر أوصف المجهود المبذول في العمل”.
أوضح: “أنا أغلب الناس في المسلسل أشتغلت معاهم، لكن دي أول مرة أشتغل مع الأستاذ أحمد عبد العزيز، ومستمتع بالوقوف قصاده، وخالد يوسف مخرج شاطر وعارف هو عايز يعمل إيه، وهي تجربة على ما قد هي شاقة فهي ممتعة جدا.. إن شاء الله مش هنعدي أول أسبوع في رمضان وهنكون مخلصين شغل”.