وائل سعد يكتب: دليل للسكن في القاهرة (2)

دليل للسكن

في العمارة.. فيه فرق شاسع.. بين اللي ساكن في أدوار عليا.. واللي ساكن في أدوار سفلى..

وده جزء أساسي في الحياة.. أن بتعرف شكل العمارة والحياة والناس.. فمثلًا:

اللي ساكن تحت في الأدوار الأولى للعمارة.. ده محروم من معرفة تفاصيل العمارة.. جدًا.. وده الجزء الممتع في المعرفة بالمكان اللي أنت ساكن فيه.. بتعرف مين ساكن فين وشكل بيت كل واحد.. وبابه.. اللي حديد واللي خشب.. اللي حاطط دلالات دينية علشان يعرف الناس بديانته.. وطابخين أيه النهاردة؟
وتفاصل الأسر.. مين ابن مين؟ ومين بنت مين؟ ومين متجوز مين؟.. ومين بينام الساعة كام؟.. ومين تلفزيونه للفجر شغال؟ وغيره وغيره وغيره كتير……

نرشح لك : وائل سعد يكتب: دليل السكن في القاهرة (1)

ودايمًا كل السكان اللي فوق تكيفهم بيزعج اللي تحتي.. وكل اللي ساكن تحت منزعج من تكيف اللي فوق.. والغسيل أحيانًا.. ويا عيني بقى لو تنفيض.. أجري لم الغسيل.. وأقفل الشباك.. ولو بقى بيغسلوا الشبابيك اللي فوق.. تراب ومياه.. أديني طينة.. حسبي الله ونعم الوكيل

أما بقى لو الأسانسير اتعطل.. وأنت ساكن فوق.. أو فوق قوي يبقى رحت في داهية.. وابقى قابلني لو بتاع ديلفري طلعلك..

طبعًا أنا لا أرغب في عمارة فيها اسانسير.. علشان ده بيخفي كل حقائق العمارة.. بس مش لدرجة الشقة بتاعت محمود صاحبي (لا مؤاخذة يا حودة.. جبت سيرتك) بس أنا من ساعة ما عرفت أنك ساكن في الدور التاسع في عمارة لسه مركبش اسانسيرها.. وأنا في حالة ذهول.. وعمال اتخيل نفسي في الشقة دي.. والله فكرة أعملها فيلم قصير.. عن المعاناة.. يا لهوي.. وبتطلع وتنزل إزاي يعني؟ ده لما السمسار يقول في شقة في الدور الرابع.. برفضها.. حتى لو فيه اسانسير.. أفرض عطل.. اتحبس أنا فوق.. وده الرابع.. أمال التاسع.. حبيبي يا حوة..

وكمان أضف لمَسَاوِئُ الساكن فوق .. أنك أول واحد هتروح من عنده الماية لو قطعت.. وآخر واحد هتجيله.. ويفضل السكان اللي تحت خايفين لاتقطع تاني.. فعمالين ينضفوا بسرعة ويخزنوا ماية.. وأنت نفسك في نقطة.. على كده بقى ساعات

وكمان السكن في دور عالي.. هيطلع عينك في النقل.. وكل ما تجيب حاجه تطلعها يبقى بثمنها.. إلا طبعًا لو عرفت تسلك مع البواب.. وكل حاجتك وأنت بتنقل هتتكسر وتتجرح.. نسبة خساير النقل تقريبًا من 20% لـ25%
لا.. بس الحلو بقى.. أنك هتوفر في سلك الدش

بص بقى..

لو عيالك مزعجين زي عيالي حاول تدور على شقة فوق مكتب.. عيادة.. محل.. شركة.. فوق أي حاجة محدش بيبات فيها.. ولو أنت مستجد في موضوع الشقق حاول تبص لمحة سريعة لإكتشاف أولاد الجيران اللي فوق.. ولو لبست حاول تخلي أماكن قعدتك بعيد عن أماكن الدب.

السمسار بياخد نص اللي أنت فاكره.. علشان المعاملة ده فيها طرفين مش طرف واحد .. أنت النص وصاحب العقار النص

لا يفضل أن تسكن في عمارة مالكها ساكن فيها .. الرغي وحش قوي

قلب العاصمة.. الحلم الممتع اللي كل الناس بتحلم بيه