كريم فهمي: الفلوس مهمة لأي حد

قال الفنان كريم فهمي، إن الأموال إنما هي وسيلة لإسعاد بناته وزوجته، موضحا أنه لا يأخذ معه مال أثناء خروجه من المنزل، فهو لا يمثل له إلا وسيلة لإسعاد من حوله.

تابع “فهمي” خلال لقائه في برنامج “أنا والقناع” وتقدمه الإعلامية منى عبد الوهاب، عبر شاشة “الحياة“: “مفيش حد الفلوس بالنسبة له مش مهمة، أنا الفلوس بالنسبة لي وسيلة إني أعمل حاجات لبناتي ومراتي، مبعرفش يبقى في فلوس في جيبي، ومبمشيش بفلوس في جيبي، الفلوس بالنسبة لي أهميتها إني أبسط اللي حواليا”.

نرشح لك: أحدهما تأليف كريم فهمي.. حمادة هلال يستعد لبطولة فيلمين

أضاف: “بناتي هما نقطة ضعفي، ومبستحملش مراتي تزعق لهم وممكن اتخانق معاها، لكن ممكن نقطة الضعف تتحول لمصدر قوة لأنك لما بتلاقي نفسك محتاج مصاريف كتيرة، وأنهم محتاجين حاجات فبتتحول لمصدر قوة إنك تقدر تشتغل وتاخد فلوس وتصرف عليهم، ومبيشوفش مني غير قناع الدلع”.

أوضح: “دانيا مراتي استحملتني بشكل كبير من كل الجوانب من ساعة ما رحت اتقدمت لها، وكنت لسه ببني نفسي وعندي عيادة في حتة شعبية وممعيش فلوس، ومعنديش عربية”.

أشار: “استحملت فترة كبيرة إني كنت زي أي راجل عينه زايغة، مفيش راجل عينه مش زايغة، أكيد كل واحد عنده غلطاته ومشاكله، ومفيش قرار في حياتي باخده غير لما أقوله لها”.