تامر حبيب يشيد بأداء حمزة دياب: موهوب وبيجبرك تصدقه
حمزة دياب
أشاد السيناريست تامر حبيب بمسلسل “كامل العدد” وبالحوار والأداء والأحداث وجميع فريق العمل.
كتب “حبيب” عبر صفحته الرسمية على موقع تبادل الصور والفيديوهات “إنستجرام”: “الشهادة هاتبقى مجروحة وأنا بأتكلم عن ( كامل العدد ) علشان رنا أبو الريش و يسر طاهر دول بناتي، فلذات أكبادي… ستتين جدعان و أذكياء و عندهم طموح وإصرار وناويينها ناويينها، واهو حصل و اختاروا موضوع و نوعية و حدوتة و علاقات و احداث خفيفة”.
تابع: ” قصدوا يركزوا على أن الابتسامة تفضل مرسومة على شفايفنا طول ما الحلقة شغالة، ايقنوا إننا كلنا فينا اللي مكفينا من اول ما نصحى لغاية ماننام… كان عندهم الجرأة والمجازفة في انهم يختاروا تيمة فيلم من الافلام اللي كلنا حافظينها ويعملولها معالجة مودرن و مختلفة مع أمانة أنهم يذكروا في التتر أن مسلسلهم مستوحي من (عالم عيال عيال)، و معالجة ذكية وشيقة و متكلمة في مشاكل حقيقية و كبيرة و تناولوها بخفة ظل و رشاقة مناسبة للنوعية اللي مقدمين بيها معالجتهم”.
أوضح: “ماحصلش و لا مرة ادعاء او جعلصة بالعكس، رنا ويسر كتبوا عالم عيالهم، من عالمهم و عالم عيالهم هما الشخصي، من مشاهدات ومواقف وعلاقات شافوها عند ناس وعاشوها هنا بنفسهم، و عشان كده اغلب المشاهد طلعت حياتية سلسة، بهجتها لا تخلو من الشجن”.
نرشح لك: إيمان العاصي: عاملة اتفاق مع بنتي محدش فينا يتجوز
استكمل: “وجه الجميل خالد الحلفاوي ببساطته وطعمه وتعامل مع ورق بناتي من غير إي ادعاء و لا فذلكة، لتخرج المشاهد من تحت إيده زي كوباية المية، تبل الريق و تروي عطشنا لشوية بهجة و طبطبة”.
أردف: “أما عن العيال، أو بمعني أصح الولاد والبنات ولاد دينا وشريف، فأنا بجد بجد بأحيي اختيار خالد لكل واحد فيهم بدون استثناء و شغله علي آدائهم و الهارموني بينهم، و ده مش سهل خالص علي فكرة.. و اسمحولي أخص بالذكر، ابن دينا الكبير و بنت شريف الصغيرة… أنا اهو و أنتوا اهو، افتكروا أن الشاب الجميل اللي عمل ابن دينا (وآسف إني مش عارف اسمه وده عيب وتقصير مني بس متأكد إني هاعرف اسمه و هاحفظه كويس قوي) افتكروا ان الشاب ده لو فضل مركز و طبيعي و صادق وذكي هايبقى ممثل مهم علشان الراجل ده موهوب بجد و بيجبرك تصدقه و تفضل مركز معاه”.
أضاف: “ولازم اعترف أن ظهور بدرة في أي مشهد كان بيبهجني وينعنشني و ابقي مش عايزها تمشي من قدامي، مصطفي درويش كان بالنسبة لي برده مفاجأة سارة و منعشة، طبيعي جداً و مصدق جداً و عامل الشخصية بآداء كوميدي وراقي وحقيقي و لطيف جداً جداً جداً”.
أكد: “مشاهد دينا مع الأولاد كلهم كانت جميلة ورايقة، بالذات لما تكون فيه مشكلة بجد، زي مشهد المواجهة بينها و بين بنتها لما عرفت أنها عايزة تتجوز (البنت دي كمان كويسة جداً و بالذات في المشهد ده) تركيبة علاقات العيلتين و المواقف بينهم و تطور علاقاتهم بعيد عن كليشيهات زوجة الاب اللي بتعذب عياله، و زوج الأم القاسي عديم القلب، ولا الحما اللي أبشع من العما، ولا المطلقين اللي مشحططين بعض في المحاكم”.
أفاد: “حسستني أن الدنيا لسه بخير، وأن لسه ينفع نشوف علاقات في الدراما عادية من غير جرائم ولا عفاريت ولا جثث، ولا موسي اللي لازم يطلع فرعون.. ينفع نشوف ناس بيتكلموا ويسمعوا بعض من غير ردح و صريخ و سجع و استعارات ملوية”.
استطرد: “ناس شبهنا عادي.. ناس لمًا كانوا يتجمعوا في بيت الجد المريح للأعصاب ويتغدوا غدوة دسمة و يقعدوا قعدة رايقة، يلعبوا و يتسامروا و يقربوا من بعض، لأ قال وبدرة ترقصلهم وترقصهم كمان، حسيت إني عايز اقضي معاهم اليوم الحلو ده.. يا جماعة المرة الجاية أنا راشق، اعزموني معاكم، وماتقولوليش..كامل العدد”.
تامر حبيب عن حمزة دياب
View this post on Instagram
مسلسل “كامل العدد” لدينا الشربيني بطولة شريف سلامة، آية سماحة، أحمد كمال، أحمد جمال سعيد، جيهان الشماشرجي عمرو جمال، والفنانة القديرة إسعاد يونس وحمزة دياب، المسلسل من تأليف يسر طاهر، رنا أبو الريش ومن إخراج خالد الحلفاوي.
تدور الأحداث حول قصة حب تعيشها ليلى تيمور (دينا الشربيني)، وفي الوقت نفسه تواجه أزمة الزواج في سن صغير، لنكتشف مفاجآت عديدة تخص أطفالها وحياتها الزوجية، ويتكون مسلسل كامل العدد للنجمة دينا الشربيني من 15 حلقة وتدور أحداثه في إطار اجتماعي لايت كوميدي.