محمد سامي: "جعفر العمدة" منجحش بالصدفة.. ورمضان أشطر ممثل في مصر

قال المخرج محمد سامي، إن نجاح مسلسل “جعفر العمدة” فاق توقعاته، كما أنه يحب التعاون مع الفنان محمد رمضان.

قال “سامي” خلال لقاء مع “ET بالعربي: “الحمد لله “جعفر العمدة” حقق النجاح اللي كنت بتمناه، وأكتر كمان من اللي كنت بتمناه، و(جعفر العمدة) منجحش بالصدفة، في حوالي 800 شريك في النجاح ده”.

وعن تعاونه مع محمد رمضان: “بيني وبين محمد رمضان كيميا واستيعاب، مش كل الممثلين اللي بيشتغلوا معايا أقدر أطلب منهم نفس الطلبات اللي بطلبها من (رمضان) في التمثيل، لأن هو قدراته غير عادية بردو”.

تابع: “طبعا محمد رمضان أشطر ممثل في مصر، مش عايز حد يبقى زعلان من دا، بس محمد قدراته غير عادية ودايما هبقى منحاز لمحمد لأن أكبر نجاحاتي معاه، وهو عمره ما خذلني.. ودايما بقول أدي محمد سم يرجعلي متر”.

وعن البناء الدرامي لشخصية “جعفر”، قال: “قولت لمحمد رمضان هنبني الشخصية على أنه هيكون جنتلمان شعبي، كنت ببني شخص مبني على فكرة التناقضات، كمان هو فيه العادات اللي تخلي الناس تتوحد مع الشخصية، بيقدس العيلة ودي أهم حاجة فيه كبطل شعبي”.

مسلسل”جعفر العمدة” بطولة محمد رمضان، زينة، هالة صدقى، إيمان العاصى، مي كساب، منة فضالى، أحمد داش، منذر رياحنة، عصام السقا، فريدة سيف النصر، مجدى بدر، أحمد فهيم، فتوح أحمد سلوى عثمان، فريدة سيف النصر، جورى بكر، طارق النهرى، أحمد عبدالله، إحسان الترك، ومن تأليف وإخراج محمد سامى، وشارك فى السيناريو والحوار مهاب طارق وإنتاج شركة ميديا هب “سعدى – جوهر” برعاية المتحدة للخدمات الإعلامية.

تدور أحداثه حول الصراع القائم بين المعلم “جعفر العمدة” والمتزوج من 3 سيدات في حي السيدة زينب، والذي يمتلك شركة مقاولات، وعايدة التي تطلب قرضا بقيمة 40 مليون جنيه لإنقاذ والدها من السجن، ويستغل الموقف المعلم جعفر ويطلب منها الزواج، فتضطر عايدة للموافقة ويستمر صراع الخداع.