شيرين: رجعت لحياتي.. السمكة رجعت للبحر

كشفت الفنانة شيرين عبد الوهاب عن تفاصيل حفلها المقبل في كوكا كولا أرينا في دبي المقرر إقامته في 28 أبريل الجاري.

قالت “عبد الوهاب” في لقاء مع ET بالعربي: “أنا سعيدة بحفلة دبي الجاية وعلى فكرة أنا كنت سعيدة من أول ما عملت حفلة الكويت، يعني من أول رجوعي بداية من حفلة الكويت ودلوقتي إن شاء الله دبي وفي مفاجأة كمان أيام في دولة كبيرة طبعا، فأنا مبسوطة ورجعت لحياتي، رجعت للبحر، السمكة رجعت للبحر”.

نرشح لك: تفاصيل أزمة السخرية من شيرين عبد الوهاب ورد مدير أعمالها

تابع: “هقدم كل جديد إن شاء الله، في وحشة كبيرة من الناس، وهما واحشني أكتر، وشغلي وحشني، لو كنت اتأخرت عليكم دي كانت ظروف نفسية أكبر مني أوي، وكان الاختفاء ده جزء من نقاهة كنت محتاجة لها من سنين، أنا بشتغل”.

استكملت: “أنا بشتغل وأنا عندي 13 سنة في الوسط وفي حوالي 25 سنة مشهورة، فده كان كبير أوي عليا، كانت سنين حلوة وكلها نجاحات وتنوع من حيث البلاد اللي زورتها وغنيت فيها، فالعالم بتاعي ده أنا كنت محتاجة أخد إجازة شوية منه بجانب الظروف النفسية اللي مريت بيها، أنا دلوقتي في جزء كبير تعافيت لكن لسه برضو في شوية حاجات نفسية تاعباني”.

أردفت: “بحس إن كل البنات اللي في سن بناتي هما بناتي والجمهور كله بحس إن أنا بنتهم وهما ولادي، الحب اللي أنا شوفته من الناس والاهتمام والدعم كان فوق الوصف وفوق الخيال”.

أشارت: “هغني أغنيتين جداد على المسرح.. عندنا شوية مشاكل إدارية بتخلص مع شركة روتانا والأغاني موجودة بس طرحها أول ما المشاكل الإدارية دي تخلص هيتم طرحها وأنا موجودة اهو وإذا كانت الأغاني اتطرحت في الأسواق ولا لاء أنا هغني على المسرح”.