نهى عابدين عن تجربة الاكتئاب: كنت بدمرني!
تحدثت الفنانة نهى عابدين، عن فترة الاكتئاب التي مرت بها وكيف تخطتها رغم صعوبتها، مرورا بتحقيق أمنيتها بالعمل مع الفنانة منى زكي في مسلسل “تحت الوصاية”.
قالت “عابدين” خلال لقائها مع برنامج “الستات مايعرفوش يكدبوا”، المذاع عبر شاشة cbc: “أنا سبت نفسي للاكتئاب وخدت وقتي وخبطت في حياتي جامد وحتى فكرت في الاعتزال.. وصلت للقاع، سيبي نفسك للحزن واغضبي وازعلي وخدي المرحلة دي كاملة”.
نرشح لك: منة فضالي: أنا متآمرة على نفسي.. وعايزة أمثل دور فلاحة أو مجنونة
أضافت: “تجربة الاكتئاب دي خلتني أتأكد إني مبتطورش وأتحسن غير بالعزلة، وأنا لما قعدت مع نفسي اتأكدت إني بدمرني، فروحت لدكتور نفسي وده طبعا اللي ساعدني أكمل حياتي”.
أردفت: “زي ما بنروح كل فترة نعمل تنضيف أسنان عند دكتور الأسنان، لازم كل فترة عشان نفضل محافظين على نفسنا نروح نعمل صيانة لنفسنا ولروحنا عند دكتور نفسي، لأننا بنمر بأحداث وطاقات وكبوات مختلفة.. وإلا هنقف ومش هنقدر نكمل”.
كما تحدثت عن دورها في مسلسل “تحت الوصاية”، قائلة: “كان نفسي أشارك في عمل مهم مع مخرج مهم وشاطر في دور جديد عليا، وكان نفسي أشتغل مع منى زكي.. استفدت منها إني اتعلمت الالتزام، لأنها ملتزمة جدا جدا وبتحترم المخرج مهما كانت نجوميتها.. مش متسلطة أبدا زي ما بنسمع عن ناس، ومش مهتمة بشكلها على قد ما مهتمة إزاي تخدم الدور.. ده دليل على الثقة والإخلاص للمهنة، وإنسانة بسيطة ومعندهاش أي تكلف”.
مسلسل “تحت الوصاية” تأليف خالد وشيرين دياب، وإخراج محمد شاكر خضير وإنتاج ميديا هب سعدى – جوهر، وبطولة منى زكي، دياب، نهى عابدين، أحمد خالد صالح، رشدى الشامى، على الطيب، مها نصار، خالد كمال، ثراء جبيل، محمد عبد العظيم، أحمد عبد الحميد وعدد آخر من الفنانين، ويناقش العمل قانون الوصاية بعد وفاة الأب أو الزوج.