للمرة الثانية.. غادة والي ترد على اتهامات فنان روسي بسرقة رسوماته

ردت المصممة غادة والي، على اتهام الفنان الروسي، جورجي كوراسوف، لها بسرقة رسوماته للمرة الثانية واستخدامها في الحملة الإعلانية لشركة المشروبات الغازية “بيبسي”.

قالت “والي” خلال مقطع فيديو مصور لـ برنامج “تفاعلكم” المذاع عبر شاشة “العربية”: “أنا أول مرة أتكلم عن حياتي، السنة اللي فاتت أنا تعرضت لأزمة إعلامية كبيرة جدا، وساعتها أنا كنت بولد وحصل لي مشاكل في الولادة وكنت في المستشفى فمكنش عندي فرصة أرد بكل قوة بس المرة دي أنا هرد، أنا زي أي حد تعرض لتنمر إلكتروني بشكل كبير وده أثر نفسيا ومهنيا لمدة السنة اللي فاتت دي كلها”.

أشارت: “ده بيحصل لي تاني دلوقتي، وده بالنسبة لي كابوس مش قادرة أشوفه تاني بيحصل من غير أعرف أتكلم وأدافع عن نفسي، أنا من ساعة ما رجعت من إيطاليا بعد ما خلصت الماجستير بتاعي كان كل هدفي في الحياة إزاي أخلي التصميم يحيي التراث المصري، وده مش أول مشروع أعمله بيتكلم عن نفس الفكرة دي”.

أوضحت: “مش أي حد يقول أي اتهام نصدقه من غير ما يكون في أي دلائل، الحملة بتاعت شركة المياه الغازية دي اتعملت سنة 2018 وأنا رسمت الرسومات دي بإيديا، موجودة على النت ممكن تشوفوها، ودي كانت أول مرة الشركة دي تقتبس من فنان مصري”.

أردفت: “ومن كتر ما الحملة دي كانت ناجحة الشركة طلبت مني أعمل مسابقة في كلية فنون تطبيقية مع الطلاب بنفس الفكرة، ودي أحلى حاجة شوفتها في حياتي، الطلاب كانت مبسوطة أوي وحسوا بانتماء لتاريخنا وتصاميمنا الملهمة الجميلة، مش محتاجين نقلد حاجة أو نوصل لحاجة برا عشان نحس بيها، أنا بحترم كل الفنانين جوا أو برا مصر، وبحترم القانون والقضاء المصري وأنا هلجأ للقضاء، أنا مش هسيب حقي، وبحترم شغلي اللي فات واللي جاي”.