أستاذ طب نفسي: التوتر مفيد للطلاب لكن بشرط!

التوتر مفيد للطلاب

مريم عبد الحافظ التوتر مفيد للطلاب

وجه الدكتور هشام راضي – أستاذ الطب النفسي بجامعة عين شمس، عدة نصائح لطلاب الثانوية العامة، وأولياء الأمور، للتغلب على التوتر بسبب اقتراب موعد الامتحانات.

قال “راضي” في مداخلة هاتفية لبرنامج 8 الصبح، على شاشة “dmc”: “القليل من التوتر الذي يدفعني إلى العمل والانتباه والاجتهاد هو شئ مفيد جدًا، ولكن ما زاد عن حده انقلب ضده، فإذا زاد التوتر سيؤدي إلى تأثير عكسي، وأستطيع معرفة أنه أصبح غير صحي عندما يدفعني التوتر إلى تجنب مواجهة ما أفعله”.

نرشح لك: نصائح لتغذية سليمة لـ طلاب الثانوية العامة

أوضح: “يعني لو أنا طالب ثانوية عامة والتوتر بقى يُعقيقني عن المذاكرة، أو المراجعة، أو عن تأدية الامتحانات التدريبية، فهو كده توتر غير صحي، وبرضه بقول لأولادنا وأهالينا إن لو مفيش توتر خالص ده مصيبة، لإن اللامبالاة عدو للإنسان وهتخليه برضه ما يذاكرش، فـ احنا محتاجين التوتر الصحي اللي يديني طاقة أذاكر اكتر، ولما أدخل الامتحان ابقى مصحصح وأجاوب كويس”.

تابع: “دورنا كإعلام وأهل إننا نذكر المفاهيم الصحيحة، فالمذاكرة الكتير مش صح لأنها لو زادت عن حدها برضه هتنقلب ضدها، فتنظيم الوقت شئ ضروري لأن المخ والجهاز العصبي محتاجين لراحة عشان تثبيت المعلومات، فمش كل شوية تقول لابنك هو انت هتريح لأ قوم ذاكر، لأنه لازم يرتاح حتى لو هيقعد على الكرسي ويغمض عينه، عشان يدي فرصة لجهازه العصبي يخزن المعلومات فيقدر يسترجعها في الامتحان”.

أضاف: “ثاني حاجة النوم صديق الجهاز العصبي، فلازم ننام بالليل من ٦ لـ ٨ ساعات، وده بيساعد المخ يثبت المعلومات، والحاجة الثالثة هى بعض الرياضة الخفيفة، مش لازم يروح النادي ويلعب، كفاية بعض التمارين البسيطة في البيت لأنها بتوسع الرئة وبتساعد على دخول الأكسچين للجسم، عشان تساعد الجهاز العصبي على العمل بفاعلية، والحاجة الرابعة إن للأكل الصحي دور مهم في التغلب على التوتر، لأنه بيساعد العقل على التذكر والاستذكار”.

ووجه أستاذ الطب النفسي رسالة لأولياء الأمور في ختام حديثه قائلًا: “ودورنا كأهالي إننا مانعملش بيئة توترية حوالين ولادنا، ومانحسسهومش إن الثانوية العامة هى نهاية العالم أو اللحظة الفارقة في حياتهم، هى أه مهمة وبتساعدنا في تحديد مستقبلنا، لكنها ليست نهاية العالم”.