لميس الحديدي لـ محمد رمضان: أنت بتعاير البلد؟!

علقت الإعلامية لميس الحديدي، على صورة الدولارات التي نشرها محمد رمضان عبر حسابه على مواقع التواصل الاجتماعي، وكذلك ركوبه الجمل في جولته بأمريكا.

قالت “الحديدي” خلال تقديمها برنامج “كلمة أخيرة“، مساء السبت، المذاع عبر شاشة “ON”، إنها لها موقف واضح من بعض الأشياء التي يقدمها “رمضان”، مردفة: “ليا موقف واضح من بعض الحاجات اللي بيحاول يسرسبها للمجتمع”.

أشارت إلى أنها توقفت أمام صورته بالجمل في أمريكا، وكذلك صورته بالدولارات، مضيفة: “هعلق بس على الصورة الأولى اللي وكأن رمضان بيأكد الصورة اللي بنحاول سنين نمسحها من هوليوود، دايما بنلوم هوليوود عن أنها بتتكلم عن العرب والمسلمين بالشكل دا، على فكرة ممكن يكون كليب أو أي حاجة، لكن المشهد دا هو اللي بنحاول نمسحه من الأفلام الأمريكية كلها وعقلية المنتج الأمريكي”.

تابعت: “يا عم أنا مش واحد راكب جمل وعايش في صحرا، إحنا دول في مننا دول متقدمة، شكلنا مش كده، مبنركبش جمال في الشارع في أي بلد، إحنا ناس بنركب أحدث أنواع العربيات وعندنا تاريخ وحضارة، نحن متطورون، إحنا بنحاول الصورة دي من هوليوود وهو بيأكدها، دا أول خطأ وخطيئة”.

أشارت إلى أنه حذف صورة الدولارات بعد نشرها عقب استفزاز الناس، موضحة أنها ترى تلك الصورة “إحداث” لكنه حر كيف يعبر عن نفسه. مردفة “المشكلة أنك عارف كفنان كبير ومسلسلك ناجح وغني، أننا عندنا أزمة دولار.. أنت يعني بتشحت علينا! ولا بتقول للبلد والدولة أنا بقى اللي هجبلكوا الدولارات.. أنت بتعاير البلد يعني؟! هو مبيكلمش الناس على فكرة، لأنه بيعتبر نفسه أعلى بكتير، لأنه لو بيهتم بالناس كان اهتم بالطيار اللي قهره لحد ما مات.. أنا معرفش عايش ازاي بسعادة وضميره عامل ازاي، بعد ما تسبب من رفد شخص من عمله بدون قصد”.

كما وجهت سؤالا للجمارك: “هل سيفصح محمد رمضان عن هذا الكم من الدولارات؟ وأتمنى أن حد في البرلمان يقولنا هو بيدفع ضرايب ولا لأ، بما أنه معاه شكاير دولارات!”.