هاني شنودة: جائزة الدولة التقديرية حلم لم أتصور حدوثه
علق الموسيقار هاني شنودة، على فوزه بجائزة الدولة التقديرية لعام 2023، موضحا إنه علم بالجائزة من أحد جيرانه، ولكنه لم يصدقه، لافتا إلى أنه لم يتم تبليغه رسميا بفوزه بالجائزة.
أضاف “شنودة” خلال مداخلة هاتفية في برنامج “يحدث في مصر” المذاع عبر شاشة mbc مصر ويقدمه الإعلامي شريف عامر: “واحد جاري قال لي النهاردة الصبح أنت خدت جايزة الدولة التقديرية، وأنا الحقيقة مصدقتوش، قولت يمكن ملبسش النضارة وهو بيقرأ ولا حاجة، ولما انهالت عليا التليفونات بالتهنئة قولت يبقى الموضوع بجد، بس محدش من المسؤلين كلمني وقال لي أنت فزت، لحد دلوقتي مخدتش خبر رسمي”.
نرشح لك: بعد فوزه بجائزة الدولة التقديرية.. أشرف زكي: شرف لي خدمة مهنتي
أشار: “أنا مبهتمش بالتفاصيل دي، وحصولي على الجايزة التقديرية ده حلم مكنتش أتصور أنه يحصل، كون الدولة تقول إحنا شايفينك ومقدرين مشوارك الفني ده موضوع مهم جدا”.
أوضح: “أنا اتكرمت في أغلب بلاد العالم، سويسرا وأمريكا وأعلى تكريم حصلت عليه كان في السعودية، لكن في حاجة عشان الناس تبقى عارفة، هاني شنودة صنع في مصر، وده أعلى مراتب التقدير”.