بينهم فنانة أكد أن زيجاتها فاشلة.. حكايات حسن يوسف عن هؤلاء النجوم
تحدث الفنان حسن يوسف، عن تاريخه الفني وعن مواقفه مع عدد من النجوم، وذلك خلال ندوة له على هامش تكريمه بقصر السينما مساء أمس.
وجاءت أبرز حكاياته عن النجوم كالآتي:
– سعاد حسني:
كل زيجاتها للأسف الشديد كانت فاشلة، أنا كنت زي أخوها، تكلمني الساعة 2 الفجر تقولي إلحقني صلاح كُريم هيموتني، أجري بالبيجامة والشبشب، وأكلم أخوه عشان نلحق الخناقة، كانت طيبة وكنت أقولها بطلي العبط ده، شغلي مخك، كانت ممثلة لا تُعوض.
– عبد الحليم حافظ:
كلموني لتوقيع فيلم “الخطايا” مع عبد الحليم ومضيت ولقيت حليم بيكلمني وبيقولي إحنا دورها طالعين إخوات بنموت في بعض إزاي هنتقابل في الاستوديو كده وإحنا لسة منعرفش بعض فقالي تعالى إقعد معايا ومنزلتش مع عنده إلا بعد أسبوع.
– رمسيس نجيب:
عملي عقد احتكار بعد “أنا حرة”، ولكن في الوقت ده كان حب لبنى عبد العزيز، وتفرغ للحب ونسى السينما فبدل ما نعمل 6 أفلام غرق في الحب وأنا قلتله أنت قعدتني جنبك في التلاجة فقالي هديك كل شهر 75 جنيه، كنت بقبضهم أول كل شهر ومفيش تمثيل.
– فريد شوقي:
فريد شوقي كان عايزني معاه في “سوق السلاح” قلتله قول لرمسيس فكلمه قاله طيب هدهولك بس هات 5000 جنيه وباعني لفريد، والفيلم ده كان وشه خير عليا.
– هند رستم:
شافتني هند رستم في فيلم “سوق السلاح” وكانت بتدور على واحد تعمل معاه “نساء وذئاب” فقالت هو ده وجابتني في الفيلم واستمرت الصداقة معاها في عدة أفلام أخرى.
– عبد المنعم مدبولي:
كان أول واحد يقول شتيمة في المسرح، أنا كنت بحبسه في شوال وأربطه وأمثل حواليه إن فيه عصابة هتخطفه، هو بيشك بقى وبيطلع راسه من الشوال أول ما شافني شتمني، هو كان أستاذ كبير أوي.
– حلمي رفلة:
أنا بعتبره الأب الروحي للوسط الفني، وكان يحافظ على كل علاقاته بالوسط، ويرعى العلاقات الزوجية، أنا وشمس نتخانق كان بيجي يشرب فنجان قهوة ويصالحنا ويمضينا فيلم ويدينا العربون.
حسن الإمام:
أنا بسميه العبقري، أنا بعتبره أهم مخرج في السينما، كان بعمل أي حاجة، كوميدي، تراجيديا، ويألف ويكتب، وله عليا فضل كبير أوي، لأنه خدتني معاه أفلام كتير، قلتله مرة أنت بتمد إيدك في معدة الممثله تطلع موهبته.
– شمس البارودي:
شمس نسيت إنها ممثلة دي ممثلتش من سنة 1981، حبها لبيتها وجوزها وأولادها أهم من أي حاجة، هي تحب المطبخ أوي أكتر مني
في سياق متصل كرم الفنان تامر عبد المنعم، مدير عام الثقافة السينمائية ومدير قصر السينما، الفنان الكبير حسن يوسف، وسلمه درع الهيئة، كما سلمه شهادة تقدير من وزارة الثقافة نيابة عن الدكتورة نيفين الكيلاني وزيرة الثقافة.
كما عُرض عقب الندوة فيلم “الجبان والحب” من إنتاجه وإخراجه، والعمل من بطولة كل من حسن يوسف، شمس البارودي، هند رستم، شويكار، عمر الحريري، زوزو نبيل، أحمد الجزيري، ناهد سمير، محمد رضا، نعيمة الصغير، فتحية شاهين، محمد أبو حشيش.
وكان آخر ظهور للفنان حسن يوسف فى عمل فنى، خلال مسلسل “الضاهر” الذى عرض عام 2019 بطولة محمد فؤاد وفريال يوسف ورغدة وتامر عبد المنعم ومادلين طبر وإنجى شرف وأحمد منير وأميرة هانى وسميرة محسن، وعلاء زينهم وعمر حسن يوسف وعلاء مرسى ومظهر أبو النجا وصبرى عبد المنعم، ودارين حداد وآخرون، من تأليف تامر عبد المنعم، وإخراج ياسر زايد.