جيهان قمري: الوسط الفني ابتعد عني عشان مش مزيفة

كشفت الفنانة جيهان قمري، سبب اختفائها وابتعادها عن التمثيل السنوات الماضية، وقلة عروض الأعمال عليها من قبل المنتجين.

قالت جيهان قمري خلال لقائها مع الإعلامية مروة صبري في برنامجها “قعدة ستات” الذي يذاع على شاشة “القاهرة اليوم”: “أنا بتعامل على أني برا الوسط الفني فعلا عشان أنا براه بقالي سنين، معملتش دراما من 4 سنين، واشتغلت مسرح مع الفنان محمد صبحي من سنتين”.

نرشح لك: حفلات وأغاني جديدة.. سيمون تكشف عن أعمالها القادمة

تابعت: “مش عارفة ليه مبيتعرضش عليا أدوار أو المنتجين يكلموني، وبستغرب الناس اللي بتكلمني تقولي إيه ده أنتِ هنا؟، بقولهم ما أنا هنا عايشة في مصر هكون عايشة فين”.

كشفت سبب ابتعاد الوسط الفني عنها، قائلة: “عشان أنا مش مزيفة، ومبعرفش أقول لحد أنت حلو وحبيبي وأخده بالحضن، ومعرفش أقول لحد أنت عامل حاجة حلوة من ورا قلبي، شخصية صريحة وبديك في وشك زي ما بيقولوا، بقالي 20 سنة في الوسط الفني عمري ما زعلت حد، بخلص شغلي وبمشي على طول جيهان قمري الممثلة انتهت في الاستوديو”.

أشارت إلى أن لديها جميع أرقام الفنانين ولكنها لم تتصل يومًا بأحد لطلب عمل، قائلة: “عمري ما اتصلت بحد وطلبت منه شغل، الفن دلوقتي كله شلالية وكل شلة بتشتغل مع بعض على طول، وفي ناس بتعمل أدوار صغيرة وبتظهر في كذا عمل، ولكن أنا معرفش أعمل ده لأني مش كده، ودايما طول عمري المخرج أو المؤلف اللي بيشوفوني في الدور بيبعتولي”.

برنامج “قعدة ستات” تقدمه الإعلامية مروة صبري على شاشة “القاهرة اليوم”، وتستضيف خلاله عددًا من نجوم الفن، ويعرض يوم السبت من
كل أسبوع في تمام الساعة 9 مساءً.